Wekîlê HDPyî yê Çewlîgî Erdal Aydemîrî derheqê zêdîyayîşê waqayanê Korona û şewatê daristanî yê Çewlîgî de vernîyazî dayî Meclîs û waşt ke Wezaretê Zîret û Daristanan û Weşîye cewab bidê persanê ci.
Aydemîrî bale ante ser ke gamanê normalîzebîyayîşî ra verî Çewlîg de wextêkê tewr waqa çinbî la dima hûmara waqayanê Korona zaf zêdîyaye. Aydemîrî vat: ”Ma menga hezîrane de waştbi ke kampusêkê Nêweşxaneyê Dewlete yê Çewlîgî wa bibo nêweşxaneyê pandemî la çew goş pa nêkewt. Nika pêro nêweşxaneyî bîyî nêweşxaneyê pandemî. Xebatkarê weşîye seba hacetan û xopawitişî tengîye ancenê. Doneyê zûrayînî zî hem bawerîya şarî qedînenê hem zî alozîye virazenê.”
Aydemîrî Kocayî ra waşt ke cewabê nê persan bido:
-Çewlîg de çend waqa, nêweş, merdeyê Korona estê? Rojêke de çend testî yenê kerdene?
-Teçhîzatê nêweşxaneyan qîm kenê?
-Êyê ke karantîna de yê, yenê weşkerdene û derman dîyeno înan?
Aydemîrî derheqê şewatê Çewlîgî de ke bi rojan dewam keno û her ca texrîb keno, qisey kerd. Aydemîrî rexne kerd ke şewato ke warê daristanan ê Xorxol, Waze û Servî de vejîyayo, çira nêno hewnakerdene. Aydemîrî vat: ”Şarê Servî koçê Xolxol kerdbi coka nika çew nêeşkeno mudaxeleyê şewatî bikero. Ganî selahîyetdarê dewlete seba na mesele têbigêrê. ”
Aydemîr wina persa:
– Qey bi hawayêkê pêtî şewatî rê mudaxele nîno kerdene ke hewna şiro?
– Qey Çewlîgo ke wayîrê daristanano girdan o de teyarayê hewnakerdişê şewatî çîn ê?
– Şewato ke resayo dewan de do mexdurîyetê dewijan werte ra bêro wedaritene?
– Waranê cîya cîyayan de eynî wextî şewatê sey yewbînan vejîyayî no teseduf o? ÇEWLÎG
