Merkezê Xeberan]
Ayfer Serçe (Şîlan Aras) serra 1974î de qezaya Wêranşarî ya Riha de ameye dinya û serranê lîseyî de radyoyê bi nameyê Karacadagî de pêşkêşwanîye kerde. Şîlane semedê şîyayîşê dersxaneyî şona Edene û Mêrsînî û Unîversîteya Çukurovayî de Beşê Îşletmeyî wanena. Hema ciwantîya xo de meraqê aye çapemenî rê virazîyeno. Şîlane 1998î de têkoşînê cinîyan de bi hawayêko aktîf ca girewte û bi serran çapamenîya kurdî de xebetîyaye. Şîlane serê serra 2000î de Ajansê Xeberan yê Mezopotamya (MHA) de xebetîyaye û bado ke ajans yeno qefelnayene serra 2005î de Ajansê Xeberan yê Firatî Ajansı’nın (ANF) de muxabîrîya Ermenistanî kena. Şîlane tîya de 3 serrî xebetîyena û dima ra derbazê Herêma Kurdistano Federe bena. Tîya de zî seba cigêrayîşkerdişê xokiştişê cinîyan şona bajarê Urmîye û Mahabatî yê Îranî û mabenê tarîxanê 19-23 temmuza 2006î de hetê hêzê rejîmê Îranî ra ameye qetilkerdene.
Cenazeya ci hema nêameya vînayene
Şîlane tîya de xebata 3 hewteyan kerd, dima ra mabêne 19 û 23ê temmuze 2006 de herêma Kelareşî ya sînorê Tirkîya û Îranî de hetê artêşa Îranî ra ameye qetilkerdene. Tarîxê qetilkerdişê ci qeydê Rêxistinê Rojnamegeranê Sînornênasan de sey 23ê temmuza 2006 derbaz beno. Hîn çimeyî zî sey 19ê temmuze derbaz kenê. Serê qetilkerdişê aye de 13 serrî derbaz bi û rejîmê Îranî nê wextî de tu eşkerayîyêke nêda. Pêwa pêro veng û hewldayîşan hema zî cenazeya aye nêameya vînayene.
Mîrasê aye dewr ame girewtene
Şîlane yew rojnamegera cinîya ke adetê çapemenîya azad a. Şîlane seba torrêka çapemenîya ê cinîyan awan biba bi israr bî. Têkoşînê Şîlane rojnamegerê cinîyê Kurdan rê bî rehber. Xeyalê Şîlane bi JINHAyî dir gane bi. Cinîyê Amedîyijî bi sloganê, ‘Ma ziwanê çapemenîye vurnenê. Dimayê ma do dinyaya çapemenîye sey verê nêba’ 8ê Adara 2012 de JINHA awan kerdî û heme xebatkarê ci cinîyan ra ameyne meydan.
