Navenda Nûçeyan |
Dadgeha Destûra Bingehîn (AYM) têkildarî serlêdana hevserokê berê yê HDP’ê Selahattîn Demîrtaş biryar da. Parêzerên Demîrtaş, bi hinceta ku heqê kesayetî û azadiya muwekîlê wan hatiye binpêkirin, serî li AYM’ê dabûn.
AYM’ê jî serlêdanên 24’ê mijdara 2017’an, 29’ê gulana 2018’an, 27’ê mijdara 2018’an û 11’ê kanûna 2018’an bi rengekî giştî nirxand.
Dadgehê di biryara xwe de cih da biryarên li ser pêvajoya darizandin û girtina Demîrtaş, her wiha biryara yekkirina dosyayê û biryara Dadgeha Mafên Mirovan a Ewropayê (DMME).
AYM’ê biryar da ku di girtina Demîrtaş de xala 19’an a Destûra Bingehîn hatiye binpêkirin û biryar da ku wezareta edaletê 50 hezar lîre tazmînatê bide Demîrtaş. Biryar dê ji 19’emîn Dadgeha Cezayên Giran û wezareta edaletê re jî bê şandin.
Parêzerê Demîrtaş Mahsûnî Karaman li ser tevna civakî daxuyaniyek da û xwest dawî li rewşa girtî ya Demîrtaş bê anîn.
