Dezgehê Tipê Edlîyî seba sîyasetmedara kurde Aysel Tugluka ke nêweşa demansî ya û Zîndanê Kandira de tepişîyayêne, raporê ‘nêeşkena zîndan de bimana’ da. Badê qerarî Tugluke ameye tehlîykerdene.
Merdim û avûkatê Tugluk û xeylêk kesî vizêrna verê zîndanî de pawenê. Tugluke hetê avûkatanê OHDyî, wekîlanê HDPyî Zuleyha Gulum, Serpil Kemalbay, wekîla verêne Burcu Çelîk, îdareyê partî yê Gebze, îdarekarê MA-TUHAYDER û xeylêk kesanî ra pê çapik, tîlîlî, slogana Jin, Jiyan, Azadî û vilikan ameye verwazîkerdene. Tugluke dima ra semedê tedawî ameye berdene Stenbolî.
