Cenazeya Efe Tektekîno 6 serrî yo ke bi wesayîtê zirxînî yê polîsan ame qetilkerdene ameye definkerdene. Babî Ahmet Tektekînî va: “Lajê min o 6 serre verê çimanê mi de ame qetilkerdene. Yew serre cuya ver zî polîsan pê TOMA babîyê mi kişt.”
Cenazeya tuto 6 serre Efe Tektekîno ke polîsan pê wesayîtê zirxînî cehdeyê Emekî ya taxa 5 Nîsane ya qezaya Rezanî ya Amedî kişt Goristanê Yenîkoyî de ame definkerdene.
Efe Tektekîno 6 serrî yo ke 11ê êlule de qezaya Rezanî ya Amedî de wesayîtê zirxînî yê polîsan o eciqna bi û Nêweşxaneyê Fakulteyê Tipî yê Dîcle de ameyêne tedawîkerdene cuya xo vindî kerd. Dimayê otopsîya Nêweşxaneyê Dewlete yê Selahattîn Eyyûbî cenazeya Tektekînî Goristanê Yenîkoyî de ameye definkerdene.
Wexto ke cenaze morga nêweşxaneyê dewlete ra girewtêne Babî Ahmet Tektekînî reaksîyon da polîsan ke pê wesayîtê zirxînî lajê ey kişto û va: “Wesayîtê polîsan bi hewayêko eşkera lajê mi qetil kerdo. Lajê mi 6 serre bi, mêse û vizik nêbi. Çi gureyê wesayîto zirxîn tîya esto? Polîsan senî lajê mi uca de nêdîyo? Yew serre cuya ver zî wesayîtê TOMA roşnîya rengê sûrî de nêvindert û babîyê mi qetil kerd.”
Şahidê serebûtî merdimê Tektekînî ke nêwaşte nameyê xo eşkere bike zî serebût mojna û va: “Hem kişenî û hem zî bêveng manenî. Polîsan şahidê serebûtî yê ke fotofrafî antî destbend kerdî.”
Şûbeyê Amedî yê ÎHDyî zî derheqê serebûtî de îzehat da û va: “10 serrîya peyênan ra nata rîyê qezayanê wesayîtan ê zirxînan ra herême de 17 kesan dinyaya xo bedilnaye. Seba ke sucdarî nênê cezakerdene pê wesayîtanê zirxînan merdiman qetil kenî.”
Pîrikê Efe Tektekînî Mehmet Tektekîn (85) zî 6ê hezîrana 2018an de hetê wesayîtê TOMA ra amebî qetilkerdene. AMED
