Dewanê Danzî û Kurukaymakî û deweka Koçerî yê qezaya Xozatî ya Dêrsimî de 17ê tebaxe de netîceya operasyonê leşkerî de şewatî dest pêkerdbi. Şewato ke 13 rojî yo dewlete mudaxaleyê ci nêkena û nêverdena şar bi îmkanenê xo zî hewna bikero.
Şewato ke hîrê nuqtayanê cîya cîyayan de dewam keno her roje herême ra vila beno. Walîtîya Dêrsimî vere cû îdîa kerdbi ke semedo ke rayîr çîn o, ê nêeşkenê xo biresnê warê şewatî. Walîtîye eşkerayîya xo ya perêyine de zî îdîa kerd ke înan di nûqtayan de şewat hewna kerd û ame îdîakerdene ke no şewat xo bi xo vejîyayo.
Şewato ke 13 rojî yo dewam keno rê reya yewine mudaxale ame kerdene. Walîtîya Dêrsimî eşkerayîya xo ya ewro de vat ke înan bi 2 helîkopteran hewa ra mudaxaleya şewatî kerd.
