DEM Partî bajarekê Sarocanî yê qezaya Depe yê Xarpêtî de mîtîngêk kerd. Hemserekê DEM Partî Tuncer Bakirhan, Wekîla Dêrsimî Aytene Kordu, Wekîlê Çewlîgî Omer Faruk Hulaku, namzedê Şaredarîya Xarpêtî yê DEM Partî Hayrettîn Kaya û Songule Cengîz, namzedê Şaredarîya Sarocanî Aytene Alagoz û Îsmaîl Koç, namzexê Şaredarîya Depe Songule Duzgun û Cafer Ogur tewrê mîtîngî bîyî.
Bakirhan û heyetê ci dekewtişê qeza de bi dahol û zurneyan ameyî pêşwazîkerdene. Heyet dima bi konvoyan derbazê buroyê weçînayîşî yê Sarocanî bi û tîya de şarî reyde govende girewte.
Bakirhanî meydan de xîtabê şarî kerd û vat: ”Weçînayîşê 31ê adare mabênê şarê ma û îtîfaqê JÎTEMî de yo. Ma kurd ê, elewî yê, cinî û ciwan ê. Eke ma biwazê debara xo bi qîmî bikerê û bibê wayîrê karî ganî ma raya xo bidê DEM Partî. Ma hêvî kenê ke Sarconî ra zaf rayan bigêrê. Qeyûmî heta nika tîya rê xizmet nêkerd, seba ziwan û kulturê ma çîyêk nêkerd. Ey teyna şaredarîye binê deynan de verdaye. Wa şarê Sarocanî destûr nêdo xesp, dizîye û talanê înan.
Ê kesê ke Seyîd Riza û Şêx Seîdî çin hesibnenê ma do rayanê xo nêdê înan û sindoqanê 31ê adare de înan bin bivisnê. Ma do 31ê adare de ser bikewê û 1ê nîsane de rojê demokratîkî do dest pêbikerê.”
Bakirhan û heyetê ci dima ver bi Depe kewtî rayîr. XARPÊT
