Hemserekê Pêroyî yê DEM Partî Tuncer Bakirhanî û Hemsereka DBPyî Çîgdem Kiliçgun Uçare Anqara de kombîyayîşê çapemenîye de derheqê netîceyanê weçînayîşan de qisey kerd.
Hêverî Bakirhanî qisey kerd û vat: ”Embazê ma verweçînayîşan ra nata bi îmkananê kêman la bi xurtî xebitîyenê. Ez nînan fîraz kena. Nê netîceyî mojnenê ke ma ser kewtî û îqtîdar bin kewt. Şarê kurdî ancî eşkera kerd ke hetê çareserîya demokratîke de yo. Polîtîkaya ma ya pêkerdişê şaristanan zî bi serkewtişî netîce daye. Îqtîdar rixmê dek û dolabanê xo zî bin kewt. Nika Şirnex, Qers û cayanê winayênan de xoverdayîşê şarê ma dewam keno. Ma do nêverdê ke rayê şarê ma bidizîyê.
Serkewteyê nê weçînayîşan şarê kurdî yo. Îqtîdaro ke waştêne kurdan bin bivisno, bi xo bin kewto. Nê netîceyî nê panc raştîyan eşkera kenê; Îsbat bîyo ke temsîlkarê kurdan û bindestan partîya ma ya, erkê ma yo ma Raya Hîrêyîne hîra bikerê, ma do prosesê verê ma de zî şarê xo reyde têkoşîn bikerê, şaran vera waştişê şerî yê îqtîdarî mesajê xo da û şarî haştîye waşte.”
Dima Uçare qisey kerd û vat: ”Şarê kurdî vera îqtîdarê dizdî û qeyûmanê xespkeran cewabê xo sindoqan de da. Şarê ma mojna ke ê tecrîdê Îmraliyî û şerî nêwazenê. Şarê ma bi nê netîceyan eşkera kerd ke Abdullah Ocalan îradeyê ci yê çareserîye yo. Îqtîdar verê nê îradeyê kurdan de parçe bîyo. Nê destkewteyî ê ma pêroyînan ê.
Îqtîdar hema zî verê sindoqan de keno ke bi hîleyan ser bikewo. Ma venga îqtîdarî danê ke şima Kurdîstan de bin kewtî, cade tira vejîyê şorê.”
