Merdimê xoverdayonê ke vera tecrîdkerdişê Rayberê Şarê Kurdî Abdullah Ocalanî grevê vêşanîye de yê, waşt ke ver bi vernîya Zîndanê Bakirkoyî rayra şorê, labelê polîsan rayraşîyayîş asteng kerd
Keyeyê xoverdayoxanê girewteyan seba ke paştdayîş bidê domananê xo û bale biancê çalakîya înan a vera tecrîdî ser, çalakîya xo ya nobete dewam kenê. Keyeyî her roje bi hawayêkê sîstematîkî hetê polîsan ra yenê astengkerdene, labelê keyeyî bi qerardarîye çalakîya xo rê dewam kenê. Reyna keyeyê hepsîyan waştî ke şêrî verê Zîndanê Padaye yê Cinîyan yê Bakirkoyî. Serê nameyê Konfederasyonê Sendîkaya Kedkaranê Rayapêroyî (KESK) yê Şûbeyê Stenbolî Ayfer Koçake zî seba piştîdayîşê keyeyan ewca de bîye. Keyeyê hepsîyan kişta rayîrê E-5 de arê bîyî û ewja ra waştî ke bi rayîrşîyayîşî şêrî verê Zîndanê Cinîyan yê Bakirkoyî.
Parlamenterê Partîya Demokratîke ya Şaran (HDP) Hasan Ozguneş, Saruhan Oluç û Zuleyha Gulume û xeylî hemwelatijan zî paştdayîş da çalakîya keyeyan. Labelê reyna polîsan vernîya rayraşîyayîşî birnaye û nêverda keyeyî şorê vernîya Zîndanê Bakirkoyî. Dimayê tehdîtanê polîsan yê hêrişkaran, dayîkan ard vîrî ke ewro roja dayîkan a û ê wazenê qerenfîlan vernîya hepisxaneyî de binê ro. Labelê polîsan destûr nêda keyeyan. Naye ser o, keyeyê agêrayî banê HDPyî yê Bahçelîevlerî.
Tîya de Hemserêka HDPyî ya bajarî Esengul Demîre eşkerayîya çapemenîye daye û va: “Şertanê normalan de roja dayîkan de domanî şonê leyê dayîkanê xo labelê nika dayîkî şonê serdana domananê xo.”
Parlamenterê HDPyî Hasan Ozguneşî zî qisey kerd û bale ant tecrîdê serê Ocalanî ser û va: “Bi tecrîdkerdişê birêz Ocalanî, teyna o ney, heme şarê Tirkîya û hêzê demokrasî binê tecrîdî de yê.”
Dayîkanê Aşitîye zî vengdayîş bi her kesî kerd û va: “Wa her kes destê xo bino wijdanê xo ser. Wa her kes vengê ma biheşno û ma reyde vengê xo berz bikero.” STENBOL
