Balafirên şer ên dewleta tirk û çeteyên wê bajaroka Xanesor a Şengalê û çiyayê Kuro Jaro yê Şêladizê bombebaran kir
Dewleta tirk a dagirker tevî rojavayê Kurdistanê, êrîşên xwe yên li dijî başûrê Kurdistanê jî bênavber didomîne. Di vê çarçoveyê de êrîşî Şengal û Şêladizê kir.
Li gorî agahiyên ji Şengalê, balafirên şer ên dewleta tirk a dagirker saet derdora 13.00’an de bajaroka Xanesorê ya Şengalê bombebaran kir. Hat zanîn ku balafiran raste rast malên welatiyan bombebaran kirine. Ji ber liv û tevgera balafirên şer û keşfê ya li ser navçeyê, têkildarî encamên êrîşê agahiyên zelal nehatin bidestxistin.
Duh DAIŞ û îro jî dewleta tirk êrîş dike
Hêjayî bibîrxistinê ye ku bajaroka Xanesorê piştî êrîşên qirkirinê yên çeteyên DAIŞ’ê hatibû valakirin. Lê piştî ku navçe ji hêla şervanên YBŞ, YJŞ, gerîla û pêşmergeyan ve hate rizgarkirin, şêniyên wê careke din lê vegeriyabûn. Bajarok niha jî ji hêla artêşa tirk ve tê bommbebarankirin.
Çiyayê Kuro Jaro hate bombebarankirin
Di heman demê de artêşa tirk a dagirker di van kêliyan de çiyayê Kuro Jaro yê bajaroka Şêladizê ya Amediyeyê bombebaran kir. Çavkaniyên ji herêmê ragihand ku çiya du caran ji hêla balafirên şer ve hate bombebarankirin. Têkildarî encamên êrîşê agahiyên zelal nehatin bidestxistin.
