Artêşa tirk a dagirker derdora kampa Eyn Îsayê bombebaran kir û çend malbatên DAIŞ’iyan ên li kampê reviyan. Her wiha artêşa tirk gundê Til Bêderê topbaran kir û di encamê de sivîl birîndar bûn
Êrîşên dewleta tirk a dagirker û komên çete yên girêdayî wê yên li dijî qadên sivîlan bênavber didomin. Artêşa tirk a dagirker ji Dêrikê heta Serêkaniyê, Dirbêsiyê, Tirbespiyê, Qamişlo, Girê Spî û Kobanê, qadên sivîlan bi balafir û çekên giran hedef digire. Ji ber vê yekê jî heta niha bi dehan sivîl hatin qetilkirin û bi sedan jî birîndar bûn.
Di vê çarçoveyê de artêşa tirk a dagirker herêmên li nêzî kampa Eyn Îsayê topbaran û bombebaran kirin. Li ser vê yekê jî rêveberiya kampê daxuyaniyek da û destnîşan kir ku jiyana bi dehhezaran koçberan di bin xetereyê de ye. Rêveberiya kampê diyar kir ku ji ber vê sedemê jî hinek malbatên çeteyan ji kampê reviyan û ew jî hewl didin kampê veguhêzin cihekê din.
Sivîl birîndar bûn
Li hêla din jî balafirên şer ên dewleta tirk a dagirker gundê Til Bêder ê li ser rêya Dirbêsiye û Hesekê bombebaran kir. Di encama bombebaranê de welatiyên sivîl birîndar bûn. Welatiyên birîndar rakirin nexweşxaneyên Til Temirê.
