Endamê Heyetê Îmrali Îdrîs Balukenî mesajê Rayberê PKKyî Abdullah Ocalan ercna û wina va: “Eke çareserîyêka raşteqîn bêra waştene, ganî raşt zî bibî. Bi qanûnanê bîyayeyan qaseyê sereyê derzînî zî averşîyayîş nêbeno.”
Parlamenterê Partîya Demokratîke ya Şaran (HDP) yê Amedî yê verên û Endamê Heyetê Îmrali Îdrîs Balukenî teşrîna peyêne ya 2016î ra nata tewqîfkerde yo û nika zî Zîndanê Sîncanî yê Anqara de yeno tepiştene. Balukenî mesajê Rayberê PKKyî Abdullah Ocalanî ke badê 8 serran avûkatanê xo reyde pêvînayîş viraşt ercna.
Parlamenterê Partîya Demokratîke ya Şaran (HDP) yê Amedî yê verên û Endamê Heyetê Îmrali Îdrîs Balukenî va: “Wexto kem a şîyêne Îmrali rojeva ma ya yewin Sîyasetê Demokratîk bî. Vindetişê Birêz Ocalanî oyo ke problemê raşteyê komelî, raşteyanê sîyasî de bêrî çareserkerdene. Her pêvînayîşî de awankar, avervînayîş û ercnayîşanê muhîman kerdêne. Fehmê çareserkerdişê meseleyan zaf hîra bî. Çîyêke vatêne de xeylê problemanê Rojhelato Mîyanenî vînayêne û çîyê ke vatêne ameyêne tesdîqkerdene.”
Tezê Ocalanî yê seba aştîye şansêko gird î
Balukenî dewamê qiseykerdişê xode înan ard ziwan ser: “Babetanê aştî, biratî û seyyewbînanî de ganî israrbîyayîş bibo. Ruhê Newroza 2013î şansêko tarîxî bî. Aye wext ruh dewre de bî. Hetê komelî zî aştî ra umid kerdêne. La dima ra şer virazîya. Girdîya dej û şerî raşte de ya. Her raşte û beşê komelî de krîz vejîyayo û no krîz dewam keno. Wexto ke ma her çarçeweyî ra ewnîyenî reyna birêz Ocalan bi israr o û ganî no israr baş bêro wendene. Tezê Ocalanî yê seba aştîye şansêko gird î.”
Hewzo veng de asnawe nînokerdene
Balukenî tewr peynî bale ant qanûnanê bîyayeyan ser û va: “Eke çareserîyêka raşteqîn bêra waştene, ganî raşt zî bibî. Bi qanûnanê bîyayeyan qaseyê sereyê derzînî zî averşîyayîş nêbeno. Kesê ke bar keweno milê înan ser partîyê sîyasî, saziyê sivîl, hunermend, rewşenvîr, rojnameger û heme beşê komelî yî. Hewzo veng de asnawe nînokerdene. Çîyo ke hewz pi keno zanyarî, fikire û munaqeşe yî.” ANQARA
