Balyozxaneya Fransa ya li Bexda ragihand ku ew bi tûndtirîn şêwe daxûyanî û gotinên bi kîn ku civaka êzidî hedef digrin, şermezar dike.
Di daxûyaniya Balyozxaneya Fransayê de hat gotin ku wek hemû pêkhateyên din ên Iraqê, êzidî jî mafê wan ê jiyana di nava aştî, ewlehî û rûmetê de heye. Hat gotin ku Fransa wê ji bo dayîna mafên êzidiyan a li Iraqê piştgiriya xwe ya ji bo êzidiyan berdewam bike.
Her wiha daxwaz ji desthilatdarên Iraq û başûrê Kurdistanê jî hat kirin ku di hewildanên ji bo ewlehî û ji nûve avakirina Şengalê de berdewam bin.
Di dawiya daxûyaniyê de jî tê gotin, Fransa piştgiriyê dide hemû giftûgo û danûstandinên aştiyane yên di navbera pêkhateyên cûda yên gelê Iraqê de.
