Hevşaredara Nisêbînê Semîre Nergiz bang li welatiyan kir ku biçin pirsgirêkên pê re hevrû dimînin bi “maseya krîzê” re parve bikin
Şaredariya Navçeya Nisêbînê ya Mêrdînê ji ber şêniyên Nisêbînê ku bi pirsgirêkên êrîşên Tirkiyeyê yên li dijî Rojava re hevrû mane û ji bo pirsgirêkên wan bên tespîtkirin û bên qeydkirin “Maseya Krîzê” ava kir. Hevşaredara Nisêbînê Semîre Nergîz xwest welatiyên ji ber pevçûnan bandor li wan tê kirin biçin serî li wan bidin.
Nergiz da zanîn ku kargeha xwe ya tamîrê ya şaredariyê veguherandinê “Maseya krîzê” û xelk dikare xwe li ser du xetên telefonê bigihîne wan û xwest welatî guh bidin hişyariyên wan. Nergîz diyar kir ku ji bajarên derdorê jî piştevanî ji bo wan hatiye dayîn û wiha got: “Bila welatî jêrzemînan de bimînin. Ne diyare gule û top ji ku ve tên. Mixabin gelek windayhiyên me hene. Em gihîştine cihê ku gotin qediyaye. Xelkê me ku çûne navçeyên din dikarin li ser telefonê xwe bigihînin me. Em heta dawiyê li cem wan in.”
Nergiz da zanîn ku ji roja pevçûnan dest pê kiriye ve dixwazin xwe bigihîhinin rayedaran lê rayedaran ne li cihê xwe ne û wiha got: “Em şaredariya gel in. Êşa gelê me êşa me ye. Hêsirên me bi hev re dirijin. Heta yek şêniyek Nisêbînê li vir be em ê jî li vir bin û em ê piştevaniyê bidin gelê xwe û li cem wan bin.” MÊRDÎN
