Oldar û serokeşîrên Şengalê, li dijî gef û polîtikayên Tirkiyeyê yên li dijî Şengalê daxuyanî dan çapemeniyê. Oldar û Serokeşîrên Şengalê bang li hêz û partiyên siyasî yên êzidî kirin ku li dijî êrîşên dewleta tirk bibin yekdeng û xwestin hemû civaka êzidî li dijî êrîşan dest bavêjin çekê û parastina xaka Şengalê bikin.
Serok û Nûneran li Goristana Şehîd Dilgeş û Şehîd Berxwedan a li ser Çiyayê Şengalê daxuyanî dan. Bi dehan serokeşîr û oldarên êzidiyan beşdarî daxuyaniyê bûn. Serokeşîr Dexîl Mirad daxuyanî xwend û wiha got: ”Em wek Desteya Eşayîr û Oldarên Êzidiyan li Şengalê, daxuyanî û gefên dewleta tirk a dagirker şermezar dikin ku yekem in welat e bi hemû hêza xwe piştgriya çeteyan dike û dixwaze serweriya Iraqê binpê bike. Dixwaze xwe bigihîne çiyayê Şengala berxwedêr û herêmê dagir bike. Her wiha di çiyayê me yê pîroz de bi hincetên xwe yên nerast baregehên leşkerî ava bike.”
‘Em ê Şengala pîroz biparêzin’
Mirad destnişan kir ku raya giştî dizane armanca dewleta osmanî çi ye û ji ber çi destdirêjiyê dike li ser welatên derdora xwe û ev tişt anî ziman: “Dîroka wan a reş tîje komkujî û qirkirine. Weke komkujiya ermeniyan, komkujiyên li dijî êzidî û elewiyan. Di dirêjiya dîrokê de, dixwazin xewn û xeyalên bav û bapîrên xwe bi cih bînin. Bi dagirkirina çiyayê Şengalê û komkujiyên nû yên li dijî gelê êzidî pêk bîne. Em li vir dibêjin kesekî xwedî xîret di rêveberiya Iraqê de nîne ku bikare serweriya Iraqê biparêze. Em weke Deste Eşayîr û Oldarên Êzidî li çiyayê Şengalê ji gefên Tirkiye û ji wan kesên hevkariya Tirkiyeyê dikin natirsin. Em ê heta dawiyê li ser şopa bav û bapîrên xwe bin û li ser doza êziditiyê ger bê xwestin em ê berdêlên giran bidin. Em bang li tevahiya gelê xwe yê êzidî û dostê wan dikin, bi me re bibin yek û bi hev re Şengala pîroz biparêzin. Her wiha partiyên siyasî û hêzên leşkerî bi erka xwe ya niştîmanî û olî rabin û li dijî van êrîşan bibin yek. Em ê heta dawî şerê xwe bikin. Çawa ku me li hemberî çeteyên DAIŞ’ê li ber xwe da û dest ji axa xwe ya pîroz berneda, berdêl çi dibe bila be, em ê ji niha şûnde jî dest ji parastina xaka xwe bernedin.”
‘Me tu carî serî netewand’
Piştî daxuyaniya Desteya Oldar û Serokeşîrên Şengalê axivîn.
Oldarê êzidî Feqîr Reşo bertek nîşanî gefên dewleta tirk da û wiha got: “Di dîrokê de gelek aliyên mîna Tirkiyeyê xwe ceribandine û êrîşî Şengalê kirine. Eger Tirkiye dixwaze ola êzidiyan tune bike û bi hincetan dixwaze êrîşî Şengalê bike, bila were. Di dîrokê de, me serî netewandiye, em ê ji niha û şûnde jî serî netewînin û em ê li ber xwe bidin.”
Feqîr Reşo bang li hikûmeta Iraqê jî kir û wiha domand: ”Eger hûn ne amade ne serweriya xaka xwe biparêzin û rê ji Tirkiyeyê re vedikin ku êrîş bike li ser me, em ê heta dawî li xwe bidin û çiyayê xwe ji tu kesî bernedin.”
Bang li hemû êzidiyan hat kirin
Yek ji kesayetên êzidî Hesen Şerîf jî bang li tevahiya êzidiyan kir ku xwedî li Şengalê derkevin û ev tişt anî ziman: “Divê êzidiyên her cihî ji bo Şengalê rabin. Li ser wan erk e li hemberî êrîşan bikevin nava berxwedanê. Bang dikin êzidiyên derveyî welat û dostên xwe ji bikevin nava çalakiyan.”
Her wiha yek ji serokeşîrê êzidiyan Şemo Xwedêda jî wiha got: “Şengal hatiya guhartin, ne wek berê ye. Her kesekî bixwaze axa me dagir bike û destdirêjiyê li ser pîroziyên me bike, em ê weke civaka êzidî li hember rabin û li ber xwe bidin.” ŞENGAL
