Piştî ku rojiya mirinê dest pê kir malbatên girtiyan li Amedê kom bûn. Malbatan bang li raya giştî kir û wiha gotin: “Em hemû gelê kurd û gelên Tirkiyeyê vedixwînin seferberiyê.”
Çalakiya greva birçîbûnê ya Leyla Guven û girtiyan dewam dike. 15 girtiyan çalakiya xwe ya greva birçîbûnê veguherand rojiya mirinê. Li ser vê yekê malbatên girtiyan li avahiya HDP’a Amedê kom bûn. Malbatan çalakiyên greva birçîbûnê û rojiya mirinê nirxandin. Malbatan piştî nirxandin û pêşniyaran ji civîna xwe encamnayek weşandin.
Encamnameya malbatên girtiyan wiha ye: “Ji bo daxwaza girtiyan were qebûl kirin me di civîna xwe de biryara seferberiyê girt. Daxwaza zarokên me daxwaz ame ye. Heta berxwedan bigîhîje armanca xwe em bi bawerin wê zarok û em wek malbatan û gelê me dê bi ser bikeve. Em wek malbat û dayikan bang li kurd, tirk, laz, çerkez, ereb û hemû gelên li vî welatî dijîn, hemû sazî û dezgehên demokratîk, hemû kesên xwedî wîjdan, hemû partiyên siyasî û rêxistinên sivil, demokrat, rewşenbîr û nivîskaran dikin û wan vedixwînin seferberiyê. Dem ne dema gotinê ye. Dem dema em biherikin qadan e. Roj roja xwedî derketina çalakiyên greva birçîbûnê û rojiya mirinê ye. Roj roja em daxwaza çalakgeran li qada qîr bikin e. Tekane rojeva me ew e ku heta encam bê bidestxistin bênavber dê berxwedan dewam bike. Em li ser vî esasî banga seferberiyê dikin. Em hemû partiyên siyasî, rêxistinên demokratîk û gelê kurd û gelên Tirkiyeyê vedixwînin seferberiyê. Em banga seferberiya wîjdanî û ehlaqî dikin. Em bi ruhê têkoşînê banga seferberiyê li dijî zilma îktîdara faşîst a AKP’ê û MHP’ê dikin. Em bi zarokên xwe re li ber xwe dikin. Ev berxwedana me hemûyan e. Em bi vî ruhê berxwedanê raya giştî ya demokratîk vedixwînin berpirsiyariya ehlaqî û wîjdanî. Em ê ji îro pê ve li hemû qadên jiyanê bi awayek bênavber berxwedanê mezin bikin. Zilkar wê têk biçin û wê berxwedan û azadî bi ser bikeve.”
Malbatên girtiyan dê têkildarî biryarên girtine pişt re plansaziya xwe bi raya giştî re parve bikin. AMED
