Alîkara Serokê Baroya Amedê Gazal Bayram Koluman diyar kir ku ew wek baroyê ji bo çareserkirina grevên birçîbûnê yên li girtîgehan amade ne ku rola navbeynkariyê bikin
Baroya Amedê ji bo bîranîna serokê berê yê Baroyê Tahîr Elçî di hefteya 171’emîn de li ber Dadgeha Amedê çalakiya heftane li dar xist. Gelek parêzer beşdarî daxuyaniyê bûn û pankarta “Em te ji bîr nakin” hat vekirin. Alîkara Serokê Baroya Amedê Gazal Bayram Koluman anî ziman ku heta niha di dosyeya lêpirsîna Tahîr Elçî de tu tiştek nehatiye kirin.
Koluman bal kişand ser nedana mazbatayên şaredarên di hilbijartina xwecihî de hatine bijartin û wiha got: “Nedayîna mazbataya şaredaran sosret e. Divê YSK biryarên ji bo kesên bi KHK’iyan hatine îxrackirin paş de bide.”
Koluman her wiha got ku ji bo çareserkirina pirsgirêka kurd reformên çareseriyê divê bikevin meriyetê. Koluman bal kişand ser grevên birçîbûnê yên li dijî tecrîdkirina Rêberê Gelê Kurd Abdullah Ocalan û ragihand ew weke Baroya Amedê ji bo çareserkirina grevên birçîbûnê yên li girtîgehan amade ne ku rola navbeynkariyê bikin.
Çalakî bi rûniştina 5 deqîqeyan bi dawî bû. AMED
