Navenda Nûçeyan |
Konseya Demkî ya Başûr a li Yemenê ku Mîrnişînên Ereb ên Yekbûyî li pişt e, ragihand ku hikûmet nikare wezîfeya xwe pêk bîne û li dijî doza Başûr komployê dike. Ji ber vê sedemê jî xweseriya xwe ragihand.
Tê texmînkirin ku biryara Konseya Demkî ya Başûr ku alîgirê serxwebûnê ye, dê şerê Koalîsyona Ereb û hêzên hikûmetê yê li dijî Hûsiyên Şîa yên beşeke mezin a bakurê welêt kontrol dike, zehmet bike.
Hêjayî gotinê ye ku konseya navborî di meha mijdarê de ji bo parvekirina desthilatdariyê, li Riyadê bi hikûmetê re peymanek îmze kiribû. Şerê ku weke ‘şerê navxweyî yê di nava şerê navxweyî de’ tê binavkirin, bi vê peymanê re ji bo demekê rawestiya bû.
Li gorî ajansa nûçeyan a fermî ya Erebistana Siûdî, Koalîsyona Ereb bi daxuyaniyekê ragihand ku şertên berê yên li Adenê divê ji nû ve bên rûniştandin û wiha hat gotin: “Piştî ragihandina rewşa awarte ya Konseya Demkî ya Başûr, Riyad ji nû ve israr dike ku peyman tavilê bi cih bê anîn.”
Roja Yekşemê Konseya Demkî ya Başûr li duyemîn bajarê herî mezin ê welêt li Adenê hêza xwe zêde kir û bendên kontrolê danî. Hate ragihandin ku avahiyên hikûmetê, Bankaya Navendî û bendergeha Adenê di nava vê herêmê de ne. Li gorî pisporan Konseya Demkî ya Başûr bi îlana xweseriyê re berpirsyariya îdarî ya Adenê da ser milê xwe.
