Bax û baxçeyê Kurdistanijanê ke serranê 90an de rîyê ferzkerdişê qorîcîtîya dewleta tirkî ra dewê xo teriknayê rîyê bêwayîrîye ra bî wişkî
Cografyaya Kurdistanî ya ke bi bereketê xo dinya de namdar a, rîyê polîtîkayanê şerî yê dewleta tirkî ra bêberdar mende. Nê dewan ra yewa ke rîyê bêwayîrîye ra bax û baxçeyê ci bîyê wişkî, meyweyê hinarî, încîrî û xeylê meyweyê bînî yê daran bîyê wişkî zî dewa Hîzûwê ya Hesenkefî ya Êlihî ya. Bax û baxçeyê Kurdistanijanê ke ferzkerdişê qorîcîyîya dewleta tirkî qebûl nêkerda û dewê xo teriknayê de rîyê bêwayîrîye ra bî wişkî.
Dewijêk ke rîyê asayîşî ra nêwaşt nameyê xo bido va ‘dewa Hîzûwê de verê cû her kes pîya ciwîyayêne û paşte dayêne yewbînî, la dimayê sîstemê qorîcîtîye xeylê dewijî mecbûr mendî ke erdê xo ca biverdê’ û va: “Ez domanîya xo ra nata tîya ya û mi qet erdê xo ca nêverda. Rixmê zext û zordarîyan de zî ma qorîcîtîye qebûl nêkerda.”
Hemwelatijo ke nameyê xo nêda ‘bax û baxçeyê dewijanê ke rîyê zext û zordarîya dewlete ra ameyê teriknayene bî wişk û ziwa, rîyê bêawî ra ê xeylî beran nêeşkenê weye bikerê’ û wina domna: “Ma nê rezê ke şima vînenê, înan ra bi tonan engure arê dayêne û ci ra dims û bastîq viraştêne. Nika teyna rezêk o. Încîrê ma, hinarê ma û çîyê ke ma debarê xo pê kerdêne rîyê bêwayîrîye ra bî wişkî.” Hemwelatijî vengdayîş bi dewijanê ke dewe teriknaya kerd ke wa apey agêrê dewa xo û bax û baxçeyanê xo ra wayîr bivejîyê. ÊLIH
