Dewijê Koterîçê Mazgirtî yê Dêrsimî debara xo bi pesdewarî û sebzeyê ke ramnenê kenê. Semedê polîtîkayê pesdewarî û citkarî dewijî problemê xidar ciwîyenê û hewl danê ke serê linganê xo de bimanê. Gulten Gunduze dewa Koterîçî de ciwîyena. Wexto ke merdim verê xo dano dewe, weşikîya baxçeyê Gultene bala merdiman ancena. Gultene ajansê ma rê qalê karê xo yê rojane kerd.
Gultene, destpêkê qiseykerdişê xo de qalê baxçeyê xo kerd û vat: “Ez karê pesdewarî kena. Şit û mast rûnê xo roşena û pê debara xo kena. Sewbîna ez citkarî dir zî eleqedar bena û baxçeyê mi de xeylê tewirê sebzeyan estê. Ez sebzeyê xo zî roşena. Ez îsot û fasûlye wişk kena û pê firîngîyan salçe viraznena. Tîya her çî organîk o.”
Gultene qiseykerdişê xo de bale ante serê berardişî û vat: “Ez wazena her çî organîk bê. Reçel, bastix û dims. Ez menga tebaxe de dest bi karê wişkkerdişê sebzeyan kena. Menga teşrîna verêne de zî tirşî virazena. Ez 25 serrî yo nê karî kena. Labelê 5 serrî yo zî tewr zêde nê karî rê eleqedar bena. Ez karê xo ra hes kena, ez zergûnî û weykerdişê heywanan ra hes kena.”
Gultene, dîyar kerd ke hetkarî nêgêna û wina vat: “Dewlete hetkarî nêdana citkarî û pesdewarî. Ganî paştdayîş bidê citkarî. Eke bi her tewir bidê do berardişêko xurt vejîyo teber.” DÊRSIM
