Hemserekê Konseya Rayberdişî yê KCKyî Cemil Bayikî Programê Taybetî yê Stêrk TVyî de rojdem ercna. Qiseykerdişê Bayikî ra qismêk wina yo:
”Dostanê ma hemleya ‘Abdullah Ocalanî rê azadîye û meseleya kurdan rê çareserîya sîyasîye’ daye destpêkerdene. Têgêrayîşê ma zî na hemle de ca geno. Înanê ke hemle da destpêkerdene, tede ca genê û semedê hemle kede danê, ez înan selam kena. Na hemleya azadîye ya. Ganî hemle dahîna bêra xurtkerdene ke biresa armancê xo. Rayber Apoyî şertanê Îmrali de zî xebatê xo rayra berdî. Vera modernîteya kapîtalîste paradîgmayêka nêwî aver berde. Merdimîyê bi na paradîgma resaye çeka pîle. Paradîgmaya Rayber Apoyî çareserîye ya. Coka zaf yena wayîrvejîyayene. Dostanê ma coka hemle daye destpêkerdene. Ganî çarçeweya hemle de şiro Tirkîya, Neteweyanê Yewbîyayeyan, CPT, Konseya Ewropa û dezehanê eleqedaran ê Ewropa ser. Heta ke vera dewleta tirke zext nêro kerdene a do çirey semedê azadîya Rayber Apoyî û çareserkerdişê meseleya kurdan game meerzo.
Ez gerîlayan HPG û YJA Starî selam kena. Çunke şertanê zaf zehmetan de, mîyanê bêîmkanîye de têna semedê kurdan nê semedê merdimîye ganê xo danê. Dewleta tirke vera înan heme çekanê NATOyî şuxulnena. Çekanê kîmyewîyan, çekanê taktîk nukleerî, tanq, top û teyarayan şuxulnena. Reyna zî netîce nêgêna. Çunke îradeyê gerîlayan zaf xurt o. Gerîlayan xeta Rayber Apoyî xo rê esas girewta û semedê şarê xo û merdimîye xizmet kenê. Nê semedî ra şertanê zehmetan de destanan nusenê. Coka ganî şarê ma wayîrê gerîlayan bivejîyo. Dewleta tirke seba ke têgêrayîşê tesfîye bikero û şarê kurdî qir bikero hem zere hem zî teber de heme îmkanê xo fînayî dewre. Qederê xo tesfîyekerdişê kurdan rê girê dayo.
Xora PDK û Barzanî her hetî ra paştî danê dewleta tirke. Her mana de vera PKK û kurdê azadî dişmenîye kenê. Nê têna Herêmanê Pawitişî yê Medya de nêkenê, Iraq de kenê, warê mîyanneteweyî de kenê. Seba ke pîya bi dewleta tirke PKKyî tecrîd bikerê, werte ra wedarê çîyo ke destê înan ra yeno kenê. Dîmenanê televîzyonî de zî ame vînayene. Qereqolê dewleta tirke û PDKyî têkişte de yê. PDK semedê qereqolanê tirkan rayîr virazeno. Dewleta tirke bi paştdayîşê PDKyî bi helîkopteran leşkeranê xo herême de ca keno. Dewleta tirke Başûr de game bi game semedê xo cayanê leşkerîyan virezena. Bê paştdayîşê PDKyî no mumkun nîyo. Dewleta tirke kena ke bi paştdayîşê Barzanîyan mudaxeleyê sîyasetê Iraqî zî bikero. MÎT Hewlêrî ra heta Kerkukî xeylêk bajaran de ameyo cakerdene û sîyaset rayra beno. Waştişê dewleta tirke oyo ke Başûrî bi temamî bifîno dest, Iraq de zî îqtdarê xo hêzdar bikero. Ganî her kes nê bivîno.
Gerîla qey şi Mexmûr? Çunke çeteyanê DAIŞî hêrişê Mexmûrî ker û waşt qirkerdiş bikerê. Armancê DAIŞî têna qirkerdiş nêbi, waşt Başûrî bifîno dest. Xora Hewlêrî ra zî nêzdî bibî. Seba ke qirkerdiş nêro kerdene, DAIŞ game meerzo Başûrî, destkewteyê şarê ma yê Başûrî tehluke mekewê bi waştişê şar û partîyanê Başûrî gerîla şi Mexmûr. Gerîla ûca têna vera DAIŞî şer kerd û têna Mexmûr pawit, destûr nêda çeteyî bikewê Hewlêrî. Yanî hukmatê Başûr zî pawit. Iraq zi pawit. Coka Mesut Barzanî bi xo şi Mexmûr, dîmenê ci zî TVyî de vejîyayî, gerîlayan rê spas kerd. Çunke gerîlayan ê pawitî.
Gerîlayan vat wezîfeyê ma temam bi û peyser agêrayî. Naye ra dima PDK cade waşt cayê ke ameyî vengkerdene bifîno dest. Coka mabênê înan û hêzanê Iraqî de pêkewiş vejîya û endamêkê MÎTî merd. No zî mojneno ke MÎT PDKyî îdare keno. Çi gureyê PDKyî ûca est o? Çunke dewleta tirke wazeno wa şiro ûca. Wina qeyde wazena kampe bigêro binê kontrolê xo û şarî qetil bikero û kampe vila bikero. Çunke PDK kampe ser o sîyaset kena. Kampe ser ambargo est o, dekewtiş û vejîyayîşê şarî yeno astenkerdene.
Teyarayê dewleta tirke tim Mexmûrî ser o gêrêne û qirkerdiş kenê. Nê qîm nêkerd nika wazenê zafêr hêriş bikerê. PDK bi waştişê dewleta tirke şi Mexmûr. Xora şarê Mexmûr zaf hole zano ke PDK qey şiyo û coka vano ma înan nêwazenê. Çunke PDK xizmetê dewleta tirke de yo. Heta nika PDK û dewleta tirke bi zûrê Kampa Mexmûrî kampa leşkerîya hêriş kerdêne. Ez nika veng dana Neteweyanê Yewbîyayeyan û Iraqî ke wa vera kampe berpirsîyarîya xo bîyarî ca.” BEHDÎNAN
