Hemserekê Konseya Rayberdişî ya KCKyî Cemîl Bayikî derheqê rojdemî de erjnayîşî kerdî. Bayikî beşê verênî yê programî de qala Roşanê Ziwanê Kurdkî, tecrîdê serê Rayberê Şarê Kurdî Abdullah Ocalan û şehîdanê Menga Gulane kerd.
Bayikî bale ante muhîmîya Roşanê Ziwanê Kurdkî ser û vat ganî keyeyî qijanê xo bi ziwan û kulturê xo pîl bikerê. Bayikî vist vîrî ke dewleta tirke ya îşxalkere bitayabetî polîtîkayanê qirkerdişî vera ziwan û kulturê kurdan rayra bena û vat şarê kurdî eşkeno wayîrê ziwan, kultur û ameyoxê xo bivejîyo û nê polîtîkayan betal bikero.
Bayîkî vist vîrî ke rixmo ke tecrîdê serê Rayberê Şarê Kurdî Abdullah Ocalanî dewam keno Wezîrê Edaletî vato ‘tecrîd çîn o,heme heqanê xo şuxilneno’ û vat: ”Na eşkerayîye zûrêka pîl a.Wezîrê Edaletî yê Tirkîya vano tecrîd çîn o, her çî rayîr de yo. Vejîyeno televîzyon zûran vano. Nê cesaretî çara geno? Ewropa ra, NATO ra, hêzanê ke komplo kerd înan ra geno. Eke nê hêzan cesaret ci medayêne o nêeşkayêne wina qisey bikero. Ez veng dana avûkatan; Avûkatî ganî têkoşînê huqûqî hol bikerî. Wa mevajê ma tay gaman erzenê la netîce nêgenê. Ganî warê huqûqî de têkoşînî xurtêr bikerê. Warê mîyanneteweyî de zî huqûqnasî est ê, pîya bi înan eşkenê têkoşînî aver berê.”
Cemîl Bayikî şehîdê Menga Gulane yad kerdî û vat: ”Ma Menga Gulane sey menga şehîdan, 28ê Gulane zî sey roja şehîdan îlan kerd. Ganî no hol bêro famkerdene. Têna na menge û na roje yê şehîdan nîyê. Ma têgêrayîşê şehîdan ê. Ma xeta şehîdan de rayra şinê. Bingeyê nê têgêreyîşî de têkoşînê şehîdan est o. Ma sededê destkewteyanê zo deydanê şehîdan ê û wazenê nê deynê xo bidê. Na çarçewe de ma têkoşîn kenê. Hêzê ma şehîdê ma yê. Ma bi xeyal û hîsanê înan têkoşîn kenê, bi erjanê ke înan afirnayî xo aver benê. Ma hêzê xo şehîdanê xo ra genê. Coka têgêrayîşê ma bi têgêrayîşê azadîye, bi hêvîya pîle ya merdimîye. Eke şarêk semedê xo erjan meafirno, erjanê azadîye xurt mekero o şar nêeşkeno biciwîyo. Eke şarê ma ewro payra yo, tarîx nuseno, hêvî dano merdimîye no xeyrê nê erjan o.”
Bayîkî vat: ”Dewleta tirke dişmenê kurdan a. Dişmenîye hem teber de hem zere de yena kerdene. Têna Vakur de nê heme leteyan de dişmenîya vera kurdan yena rayraberdene. Şarê ma zî zano. Tim zîndanan ra cenazeyî vejîyenê. Cinîyê extîyarî, merdimê 60, 70 serreyî ke nêeşkenê payra vinderî zîndan de yê. Şarê kurdî ra qesas genê. Wina kenê ke şarî bitersnê têkoşînî ra bifînî dûrî. Şarê ma ganî nê hol bizano, vera nê hêrsê xo ramojno. Pîya bi dişmenî ciwîyayîş nêbeno. Dişmen her çîyo ke Kurdîstan de keno semedê çînkerdişê kurdan o. welatperwerîye nê qebul nêkena. Welaperwerbîyayîş vervejîyayîşê îşxal û qirkerdişî yo. No heqê heme kurdan o.”
