Hemserekê Konseya Rayberdişî ya KCKyî Cemîl Bayikî Stêrk TV de Bernameyê Taybetî de rojdem ercna.
Qiseykerdişê Bayikî ra tay noqtayê girîngî wina yê:
”Tecrîdê vera Rayber Apoyî teyna kurdan ney pêro merdimatîye eleqedar keno. Tewr peyên Konferansê Lozanî de û kombîyayîşê sendîkayan ê Belçîka de seba azadîya Rayber Apoyî veng dîyabî. Nê vengdayîşan verê hemleyanê neweyan akerd. Ma do mîyanê nînan de cabigêrê û hemleyanê neweyan bijerê. Ganî pêro kurdî seba azadîya Rayber Apoyî mîyanê nê hemleyan de cabigêrê. Dewleta tirke bi tecrîdê Îmraliyî kurdan rê qirkerdişî ferz kena. Coka seba her kesî, her ca de ganî rojdemo tewr girîng bibo azadîya Rayber Apoyî. No erkê ma yo. Rayber Apo Îmrali de seba pêro merdimatîye xo ver dano. Dewleta tirke ey ra qesasê xo pê nê tecrîdî gêna û kena ke vengê Rayber Apoyî nêreso komelî.
Dewleta tirke 8 serrî yo pê çekanê qedexekerdeyan û teknîkîyan bêmabên hêrişê gerîlayan kena. Herinda gerîlayan de kam est bîyêne nêeşkayêne hende xo ver bidê. Gerîlayê ma bi fedakarî bedelanê pîlan danê. Dewleta tirke kena ke pê nê hêrişan serrgêra 100. ya Lozanî de qirkerdişê kurdan temam bikera. Hetê bînî ra heyf ke PDK û keyeyê Barzanîyan nê şerî de verê dewleta tirke de cagênê. Ganî şarê ma vera nînan tewir bigêro. Xakurkê de PDK û artêşa tirke pîya vera gerîlayan operasyon kenê. Kurdîstan de di xetî est ê; xeta xayînîye û xeta azadîye. Kurdî ganî xeta xayînîye ser de nêşirê û hetê înan de canêgêrê.
Konferansê Lozanî seba yewîya neteweyîye bi gama verêne. Kurdî xêrê Rayber Apoyî ra pê hesîyayî ke Peymana Lozanî peymana qirkerdiş û îşxalî ya coka na peymane qebul nêkenê. Dewleta tirke nêeşkaye nê konferansî asteng bikera. PDK û Barzanî rixmê hende dawetan zî tewrê nê konferansî nêbîyî. Wextê Konferansê Lozanî de PDK-Barzanîyî hetê artêşa tirke de vera gerîlayan operasyon kerdêne. Konferansê Lozanî her hetî ra zaf girîng bi. Ganî birê nê konferansî bêrê caardene.
Konferansê Lozanî de seba azadîya Rayber Apoyî veng dîya û tay birî ameyî girewtene. Seba azadîya kurdan azadîya Rayber Apoyî şert a. Kam ke azadîye û demokrasî wazeno ganî seba azadîya Rayber Apoyî têbigêro. Eke Rayber Apo azad bibo, meseleya kurdan zî çareser bena û Tirkîya zî bena demokratîk.
Reyna Konferansê Lozanî de bire dîyaye ke kurdî wa konferansê xo yê neteweyîyî virazê. Na bire zî zaf girîng a. Seba kurdan yewîya neteweyîye babeta verên a. Eke kurdî yewîya xo awan bikerê raştê hende hêriş û qirkerdişan do nêrê. Ewro seba yewîya kurdan a neteweyîye firsend est a. Kurdî ganî nê firsendî bişuxilnê.
Sîyasetê şerî yê AKP-MHPyî ra şar mîyanê krîzêkê ekonomîkî de yo. La muxalefet vera ney vengê xo nêkeno. Ganî Îtîfaqê Kede û Demokrasî komelî rêxistin bikero û bi komelî têbigêro. Îqtîdarê AKP-MHPyî Tirkîya de û Kurdîstan de xoza talan keno, şarî qir keno. Şarî ganî vera nê îqtîdarî Îtîfaqê Kede û Demokrasî hetî de cabigêro. Tirkîya de teyna krîzo ekonomîk ney krîzo komelkî û sîyasî est ê. Şarî wa bizanê ke şerê vera kurdan sebebê nê krîzan ê. Wa hînî kurdî bêrê qebulkerdene. Eke meseleya kurdan bêra çareserkerdene, krîzî do biqedê.
3yê Tebaxa 2014î vera êzidîyan Fermano 74. qewimîya. PKKyî verê qirkerdişê êzidîyan girewt. Eke a roje 12 embazê ma wayîrê Şingalî nêvejîyayêne êzidîyî do biameyêne qirkerdene. Şarê êzidîyan ewro xêrê têkoşînê gerîlayanê PKKyî û şerwananê YPG-YPJyî ra eşkeno abigêro Şingalî. Şarê Şingalî bedelê pîlî dayî la netîceyanê nînan de ewro eşkeno erdê xo de, bi bawerî û kulturê xo biciwîyo. Ewro vera Şingalî hêrişî dewam kenê. La ganî şarê Şingalî bi xoverdayîş, têkoşîn û yewîya xo wayîrê erdê xo vejîyo û ganî pêro kurdîstanijî zî hetê înan de cabigêrê.”
