Hemserekê Konseya Rayberdişî ya KCKyî Cemîl Bayikî bi wesîleya serrgêra ronîyayîşê PKKyî cewab da persanê ANFyî. Qismê verênî yê roportajî ra tay noqtayê girîngî wina yê:
“Taybetmendîyê PKKyî taybetmendîyê Rayber Apoyî yê. Famkerdişê PKKyî pê famkerdişê Rayber Apoyî mumkîn o. PKK xeta Rayber Apoyî de xoawankerdiş û çareserkerdiş o. Xora famkerdiş û çareserkerdişê mesele zî yeno manaya azadîye. Rayber Apoyî de hişmendîya tarîxî est bi. Ey seba ke tarîxê komelê kurdan zanayêne û hol ercnayêne PKK binge û raştîya nê tarîxî ser o rona. Rayber Apoyî şorişgêrîya hele aver berde yanî şorişgêrîya tarîxî.Wextêkê winasênî de ke kolonyalîzmê vera kurdan aver şibi Rayber Apoyî mudaxele kerd û nê mudaxeleyî têna kurdî nê pêro şarî aver berdî.
Rayber Apoyî Newroza 1973yî de bingeyê PKKyî eşt. O çax dişmenî Newroze manaya ci ra dûrî vistbî. Rayber Apoyî raştîya Newroze yanî xoverdayîş ganî kerde. Şarê kurdî zî bi nê hawayî ganî bi, mergî ra agêra. Rayber Apoyî 1973 de Pirdê Çubukî de mîyanê komelêka qije de raştîya vat: ‘Kurdistan kolonyal o.’ Dima ey gamê xizmî eştî, tarîxî ra netîceyî vetî, muhakeme kerd û ser kewt. Ey nîsbetê qebul û redî dîyar kerdî. Kurdistan de wayîrvejîyayîşê têkoşînê azadîye û demokrasî yeno manaya dinya de vervejîyayîşê polîtîkaya qirkerdiş û kolonyalîzmî yo. Coka destpêkî ra nata vera Rayber Apoyî û têgêrayîşê azadîye tim polîtîkayê îmha, tasfîye ameyî caardene. Rayber Apoyî xora raştîya dişmenî hol zanayêne û vera ney polîtîkayê têkoşînî aver berdêne. Rayber Apoyî tarîxî ra dersî girewtî û partîyêka fedayî, şarêko fedayî, milîtanê fedayî û Rayberîyêka fedayîye ronayî.
Kurdistan de pêro têgêrayîş û têkoşînî ancax di serrî daymîş bîyî la PKK 50 serrî yo têkoşîn keno. Çunke Rayber Apoyî dişmen hol şinasna û hêzê şarê kurdî û PKKyî xurtî ra mojna. Felsefeya Rayber Apoyî de azadîye û demokrasî yanî serkewtişî ra ber qet yew nîsbeto bîn çin o. Rayber Apoyî tim seba şarê kurdî pêro çîyî zî ardî verê çiman. Seba kurdan o heqê her çî ra ame.
Wexto ke PKK rona îmkanê Rayber Apoyî çin bîyî. Coka PKK hema destpêk de bi têgêrayîşêkê bawerî, îrade û îmanî. PKK nê esasî ser o aver şi, xo rê awankerdiş esas kerd. Ti bike ke pîl bibe û birese armancê xo. Rayber Apoyî zanayêne ke Kurdistan de her kes vera ci yo, destê çewî de çîyêk çin o ke bido to. Dima PKK bi pîl û sîyasetê dinya de bi aktîf. Cuya PKKyî cinî û camêrdî têdûşt ê, cuya PKKyî komunale û demokratîk a. Pêro milîtanê PKKyî wayîrê heman çîyan ê; çeke û kincê înan. Her kes têdûşt o. Rayber Apo de komelbîyayîş xurt o coka PKK de zî xurt o. Rayber Apoyî şarê kurdî wina kerd ke hînî no şar demokrasî û azadîye xo rê keno esas.
Ma wextê zanîngehî de Rayber Apo şinasna. O çax sosyalîzmo reel rojdem de bi. Rayber Apoyî meseleya kurdan, kolonyalîzmê vera Kurdistanî û qirkerdişê vera kurdan bi ma dayî şinasnayene. Ma wexto ke Rayber Apo şinasna cigêrayîşê ma yê serê têkoşînî û sosyalîzmî zelal bi. Rayber Apoyî rayîrê xo, teorî, îdeolojî, sîyaset, rêxistin, milîtanî, metod, uslûb û tempoyê xo bi ma dayî şinasnayene. Ma Rayber Apoyî reyde raştîya xo û raştîya şarê xo şinasnaye.
1968 de dinya de têgêrayîşê ciwanan aktîf bi. O çax têgêrayîşê ekolojî, femînîzmî zî est bîyî. Rayber Apoyî seba ke cuya azade û demokratîke esas girewtêne dî ke sosyalîzmo reel do cewab nêdo hewcedarîyanê şarê kurdî. Bi tesîrê ney zî PKK sey partîyanê bînan ê çepgîr û sosyalîstan nêbi. Reyna têkoşînê şaranê Vietnam û Filîstînî yê bindestan zî zaf tesîrê ma kerd. Hetê bînî ra têgêrayîşê ciwanan ê Tirkîya zî tesîrê ma kerd. Verî ma waştêne çepê Tirkîya reyde têkoşîn bikerê. Dima na rewşe vurîyaye.
Eke dişmen nêeşka kurdan qir bikero no xêrê PKKyî ra bîyo. Destpêk de Rayber Apo, Hakî Karer û Kemal Pîr est bîyî ke wirdî tirk bîyî. Coka PKKyî qetî nîjadperestîye nêkerde. PKK destpêkî ra nata enternasyonalîst bi. PKK pêro şaran, bawerî, nasname û kulturan keno verar. Coka ewro şarê dinya zî têkoşînê demokrasî û azadî PKK de vînenê. Rayber Apoyî wina PKK aver berd, Neteweya Demokratîke awan kerde û coka Rayber Apo û PKK tim benê pîlêr.
Rayber Apoyî wexto ke qisey kerdêne, xîtab kerdêne tesîrê merdiman kerdêne. Ey merdiman de hîsê têkoşînkerdişî afernayêne. PKK de milîtanîya wextê verênî milîtanîya fedayîye bîye. Fedakarî, çêrî û qerardarîye mîyanê PKKyî de xurt ê. Eke ewro Zap û Metîna de fedakarîyêka pîle yena mojnayene û qehremanîye qewimîyena bingeyê nînan no esas o. PKK nê esasî ser o aver şi û resa na aste.” BEHDÎNAN
