Li cîhanê siyasetek pir dijwar tê meşandin. Bi her awayî bazar tê kirin, weke ku her şêwaz rewa be têkilî û peywendî û peyman tên danîn û îmzekirin.
Hinek dewlet an rêveberên wan, dikarin di demek kurt de bibin dost û destbirak an jî bibin dijmin û neyar. Mînak a tirkan (Receb) û Sûriyeyê (Esad), Amerîka (Trump) û Koreya Bakur (Kim) û hwd.
Jixwe hêviya mirovatiyê ji wan nayê kirin, lê belê hinek pîvan û adetên burjuvazî yan jî dihat gotin giranî û aqilê dewletwarî hebû, belê niha ew pîvan û aqil jî diyar nake. Aqil û kêfiyeta hîtlerwarî, musolanî û frankoyî derketiye pêş, heta van jî derbas kirine.
Di vê sedsala me de, behsa Seddam û Omer Beşîr pir li pêş bû, lê belê yên weke Receb Erdogan, van ji mêj ve derbas kiriye. Jixwe pesindariya Hîtler dikir û dost û heval û destbirayê Omer Beşîr bû. Belê niha, em bihêlin parastina van birayên xwe, ketiye derdê man û nemana xwe. Geh diçe cem Putîn, xwe davê dexlê wî ji bo parastina xwe, geh jî diçe yan jî bi telefona rica û hewara xwe digihêne Trump ji bo wî biparêze.
Lê weke di sernivîse de diyar dibe, bazara siyasetê bi giştî ketiye nava şerê parvekerina 3’yemîn ê cîhanî û her kes, ketiya nava hewldana xwe ji vê alozî û qeyranê rizgar bike. Helbet dewletên mezin, ji bo ku para herî mezin bi dest bixe têdikoşin.
Bêguman navenda vî şerê dijwar li Rojhilata Navîn e û li vir jî navend Kurdistan e. Alîgirên sereke yên vê nakokî û şerê mezin û berfireh; Amerîka û Rûsya ye.
Serokêşiya pergala modernîta kapîtalîst a cîhanê, van herdu dewletan dikin; aliyê îdeolojîk û polîtîk û çekên giran, di destê van de ye. Belê di aliyê aborî, bazirganî û teknolojî de giraniyek mezin a Çînê derketiye pêş û di vê derbarê de van dewletan gelek tengav jî dike. Her wiha di aliyê îdeolojîk û çekên nuklerî de; Kore û Îran jî li pêşiya wan ne kelemên biçûk in.
Di qonaxa vê serdemê ya Şerê Cîhana 3’yemîn de, Tevgera Azadiya Kurdistanê cîhekî girîng digire. Ji ber ku rola Kurdistanê ya jeo-polîtîk, di asta hevsengiyekê de ye. Di têkoşîna xwe ya zêdeyî 40 salî de, xwe daye sepandin (îspatkirin) ku xwedî îradeyek xurt a xweser e. Vê taybetmendî û resentiya xwe, ji xurtbûna Rêbertiya xwe ya bîrdozî û birêxistinkirî distîne.
Her wiha di şerê xwe yê demdirêj de, yê li dijî terorîzma cîhanî ya DAIŞ’ê û bi giştî di têkoşîna xwe ya 8 salan de ya Şoreşa Rojava de, xwe weke pergalek xweser a demokratîk, bi raya giştî ya cîhanê ve da nasandin û pejirandin.
Di encamê de, mirov bi hêsanî dikare bêje, di vê bazara dijwar a siyasî de, hêz û aktorê herî xwedî îradeya xweser ê sêyemîn jî Tevgera Azadiya Kurdistanê ye. Weke hêzek û îradeyek hevseng /denge xwedî rolek girîng e.
Lewma cara yekem e ku kurd û kurdistanî weke aktorekî têkoşînê yê polîtîk, weke vîneke xweser, dîrek – endîrek di bazara siyasî de cih digirin û xwedî gotin in.
Di vê qonaxa djiwar de, di vê alozî û qeyrana giran a herêmî (û heta cîhanê) de, ji serkeftinê re, tevgera herî xwedî şens; li gel netewa kurd, bi hemû pêkhateyên xwe Tevgera Azadiyê ya welatê me Kurdistanê ye. Dewleta herî bê şens jî dewleta Receb û Devlet Bahçelî ye. Wa ye ji nav xwe ve jî, êdî verdişin. Ahmet Davudoglu, hêdî hêdî deftera kiryarên xwe yên qirêj û qirker û gemar deşîfre dike û li xwe mikûr tê ku wan bi hev re çi pîsîtî kirine?
Têkoşîna gelê me ya bi rûmet, ew ê temenê hilweşandina desthilatiya wan kurt bike!
