Merkezê Xeberan]
Sekreterê Pêroyî yê Neteweyê Yewbîyaye (NY) Antonio Guterres raporê tesîrê Vîrusê Korona yê serê domanan eşkera kerde.
‘Xeylê domanî seba ke înternetê înan çin o kewenî mîyanê grûba dezavantajî’
Antonio dîyar kerd ke pêroyê dinya de xeylê domanî nêeşkenî şêrî mekteb. Xeylê mekteban de perwerdeyê dûrî ra esto labelê heme domanî nêeşkenî ci ra feyde bigêrî. Antonio da zanayene ke xeylê domanî seba ke înternetê înan çin o kewenî mîyanê grûba dezavantajî û sewbîna Vîrusê Korona ra xeylê domanî hetê werdî de zehmetî ancenî.
‘Doman hîna zêde benî şahidê şîdetê mîyanê keyeyî’
Antonio ard ziwan ke domanî rojanê karantîna de hîna zêde benî şahidê şîdetê zerê keye û şîdetê îstismarî. Antonio derheqê fek mekteban ra veradayîş yê domanan kênaya û diganeyê lezî de îqazan kerd û dîyar kerd ke ganî şîrketê medyaya komelkî hetê şîdetê serê înternetî de tedbîran bîgîrê.
‘Beno ke serra 2020î de bi sehezaran domanî cuya xo vindî bikerî’
Rapor de ame vatene ke krîzê ekonomî yê globalî ra beno ke 2020î de bi sehezaran domanî cuya xo vindî bikerî.
Goreyê raporî beno ke 42 û 66 mîlyon domanî yê newe vêşanîye reyde rî bi rî bimanî û hûmara 386 mîlyon domanê ke vêşanîye reyde rî bi rî manenî zî zêde biba.
