Fermandarê Giştî yê HSD’ê Mazlum Ebdî diyar kir ku di encama operasyoneke hevpar a di navbera hêzên wan û yên DYA’yê de berdevkê DAIŞ’ê Ebû Hesen Muhacir li gundê Eyn El Beyze yê Cerablusê ku di bin kontrola artêşa tirk de ye hatiye kuştin
Fermandarê Giştî yê Hêzên Sûriyeya Demokratîk (HSD) Mazlum Ebdî li ser hesabê xwe yê twîtterê agahiyên girîng parve kirin. Ebdî di serî de da zanîn ku di encama operasyoneke hevpar a di navbera hêzên wan û hêzên DYA’yê de serçeteyê DAIŞ’ê Ebubekir El Bexdadî hatiye kuştin.
Di berdewamiya peyama xwe de jî Ebdî daxuyand ku hêzên wan bi operasyoneke din a taybet a bi hêzên DYA’yê re li Cerablusê li dijî berdevkê DAIŞ’ê Ebû Hesen Muhacir pêk anîne. Ebdî da zanîn ku operasyon li gundê Eyn El Beyze yê li nêzikî Cerablusê ku di bin kontrola artêşa tirk a dagirker de ye hatiye kirin û serçete Muhacir hatiye kuştin.
