Têkildarî komkujiya ku dewleta tirk a dagirker li taxa Hilêliyê ya Qamişloyê li dijî sivîlên pêk anî û di encamê de kesayetê welatparêz û têkoşer Yûsif Gulo û du zarokên wî şehîd bûn, Berdevkê YPG’ê Nûrî Mehmûd daxuyaniyek da.
Daxuyaniya Mehmûd wiha ye:
“Careke din li pêş çavên cîhanê dewleta tirk a dagirker nîşan dide ku ew ê gelê kurd li her derê qir bike.
Êrîşa hovane ya ku 9’ê Mijdara 2021’an de li Qamişloyê hat kirin, radixe pêş çavan ku armanca dewleta tirk a turanîst qirkirina kurdan û mirovan bê cudahî ye, tenê ji ber ku ew kurd in.
Di encama vê êrîşa hovane de kesayetê civakî Yûsif Gulo û neviyên wî Mezlûm Gulo û Mihemed Gulo ku bi wî re bûn, şehîd bûn.
Em terora Tirkiyeyê şermezar dikin, sersaxiya gel û malbata Gulo re dixwazin. Her wiha ji cîhanê re destnîşan dikin ku komkujiyên dewleta tirk bandorê li me nakin û me ji rêça şehîdan û têkoşîna ber bi rizgarî û xelasiya ji nîrê vê terora hovane dûr naxe.
Şehîd Yûsif Gulo kesayetekî civakî û rûspiyên civaka kurd bû, bi zanîn û helwestên xwe yên welatparêzî navdar bû. Ji ciwantiya xwe de tev li xebat û têkoşîna aştiyane û demokrasî bû ku xizmetî doza gelê xwe bike. Piştgirî da tevahî şoreş û serhildanên kurdan. Dema ku Tevgera Rizgariya Kurdistanê dest pê kir Yûsif Gulo bi hemû hêza piştgirî da û deriyê mala xwe ji şoreşgerên Kurdistanê re vekir, piştevaniya madî û manewî kir. Nemerdî ji şoreşa Tevgera Azadiya Kurdistanê re nekir û bi kezebên piştgirî da. Her wiha zarokên xwe bi tevlêbûna li nava refên şoreşgeran teşwîq dikir û di dirêjahiya şoreşa Kurdistanê de zarok û neviyên wî gihaştin asta şehadetê.
Li Rojava û ji destpêkirina Şoreşa 19’ê Tîrmehê ve, şehîd Yûsif Gulo tevî hemû malbat, zarok û neviyên xwe piştevaniya vê şoreşê kir, zarok û neviyên xwe teşwîq kir ku tev li refên şoreşê bibin û bi awayekî çalak tev li nava refên hêzên me bûn û gelek tev li karwanên şehîdan bûn û hîn jî bi dehan zarok, nevî, bira û xizmên wî di nava hêzên me de ne.
Şehîd Gulo di oxira azadiya gel û welatê xwe de têkoşerekî rasteqîn bû, rola wî di avakirina hezkirin û bingehên jiyana hevbeş di navbera pêkhateyên Bakur û Rojhilatê Sûriyeyê de mezin bû.
Em dubare vê êrîşa tirsonak şermezar dikin û piştrast dikin ku dê hêzên me ji bo armancên şehîdan wefedar bin û dê têkoşîna xwe heta pêkanîna serkeftinê û têkbirina dagirkeriya tirk berdewam bikin. Her wiha teqez dikin ku ev êrîşa tirsonak bê bersiv derbas nabe.” QAMIŞLO
