Cemîl Kirbayir de 13ê êlula 1980î de keyeyê xo de, Qers de amebi destbendkerdene û 8ê teşrîna verêne ya 1980î binê îşkenceyî de amebi qetilkerdene. Polîsan îdîa kerdbi ke Cemîl Kirbayirî nezaretî ra fîrar kerdo.
Seba ke Kirbayirî ”fîrar kerdo” derheqê hîrê polîsan de tehqîqat amebi akerdene û înan rê cezaya şenike dîyabî. La goreyê raporanê ê çaxî yê Komîsyonê Heqanê Merdiman ê Meclîsî Cemîl Kirbayir binê îşkenceyî de ameyo qetilkerdene û cenazaya ci dîyaya vînîkerdene.
A 33 serran gêraya lajê xo
Dadîya Cemîl Kirbayirî Dayîke Berfoya ke bi nameyê ”Berfo Ana” şinasîyena, seba ke lajê xo bivîna bi serran têkoşîn kerd. 2011 de Serekwezîrê ê çaxî Recep Tayyîp Erdoganî Berfo Ana û domananê aye de pêvînayîş kerd û soz da ke ê do derheqê merdimanê vînîbîyayeyan de cigêrayîş bikerê. 2012 de dewaya vera mensubanê Darbeya 12ê Êlule de Berfo Ana Kenan Evrenê darbekerî rê vat: ”To keyeyê mi şa ra. Wa Homa zî keyeyê to wina bikero. Ti nêşermayî?”
”Cenazaya mi defin mekerê”
Berfo Ana roportajêk da û vat: ”Hîrêyê ci lajî, hîrêyê ci kênayî, mi rê 6 domanî bîyî. Lajê mi Cemîl şorişgêr bi. Wexto ke ma dewlete rê o pers kerdêne, dewlete vatêne ‘O remayo şîyo.’ 27 serran mi bawer kerd ke rojêke lajê mi do abigêro. Heta ke 7 serrî verî Wekîlê AKPyî Zafer Uskulî vat ke Cemîl îşkence de merdo. A roje ra nata zî ez gêrena esteyanê lajê xo. Ez hinî wazena bimira la eke ez cenazaya lajê xo nêvîna çimeyê mi do pey de bimanê. Serekwezîrî (Erdogan) soz dabi mi ke do esteyê lajê mi bivîno. Ez pabeyê ey a. Ez wesîyet kena ke eke ez esteyê ey nêvîna û bimira cenazaya mi defin mekerê. Ez wazena lajê xo reyde heman gorî de bêra definkerdene.”
Berfo Ana bi hesreta lajê xo Cemîl Berfo Ana 21ê sibata 2013î de dinyaya xo bedilnaye.
Dewaya derheqê Cemîl Kirbayirî Mehkemeya Heqanê Merdiman a Ewropa de dewam kerdêne. Tirkîya pawitişê xo yê na dewa de waşt ke seba ke Berfo Ana dinyaya xo bedilnaya wa dewa bêra qedînayene.
