Namzedê rêzê 6. yê herêma diyîne yê Stenbolî yê Partîya Çep a Keske Hidir Karadaşî derheqê weçînayîşan de ANFyî rê qisey kerd. Karataşî wextêk Serekîya Weqfa Kultur û Perwerdeyî ya Gazîyî û Cemxaneyê Gazîyî zî kerde.
Hidir Karadaşî da zanayene ke waştiş û huqûqê elewîyan û ê Partîya Çep a Keske zaf manenê pê û vat: ”Partîya Çep a Keske sey elewîyan demokrasî, heqan û azadîye wazena. Coka ma na partîye tercîh kerde. Ewro Tirkîya de meseleya elewîyan ra bigêrê heta ekonomî, huqûq, edalet û heqê komelî zaf meseleyî est ê. Elewîyê ke 20 mîlyon merdim ê, meşrû nênê dîyene. Cemxaneyê ma sey îbadetxane nênê qebulkerdene. Qaşo no welat laîk o la dezgehê xo yê Dîyanetî est o. Coka Tirkîya hetê teorî û pratîkî ra yew nîya.
Ganî dewlete demokratîke biba
Seke zanîyeno ke wextêkê ra verî bi nameyê Serekîya Dayîreyê Elewîyan binê Wezîrîya Kulturî de çîyêk ronîya. Yanî bawerîya elewîyan rê qeyûm ame tayînkerdene. Heta ke elewîyî sey hemwelatîyanê têdûştan nêrê qebulkerdene û elewîtîye bi hawayêkê fermî nêra qebulkerdene nêbeno. Ma teyna seba elewîyan ney seba kurdan, çerkesan, misilmanan ûsn. zî hemwelatîya têdûşte wazenê. Ganî dewlete demokratîke biba û bi hema hawayî nêzdîyê merdiman biba. Ma heta nika seba demokrasî têkoşîn kerd. Nika ra pey zî ma do seba welatêkê azadî, awankerdişê Komara Tirkîya ya demokratîke têkoşînê xo rê Partîya Çep a Keske de dewam bikerê.” STENBOL
