Navenda Ragihandin û Çapemeniyê ya HPG’ê derbarê şerê dagirkeriyê yê dewleta tirk ê li Zap û Avaşînê dimeşîne daxuyaniyek da. HPG’ê aşkera kir gerîlayên Azadiya Kurdistanê derbên giran li dagikeran dixe û ev ev agahî ragihand: “Berxwedana destanî ya hêzên me û çalakiyên bi bandor, bênavber dewam dikin. Artêşa Tirk a dagirker ku 13 caran bi çekên kîmyewî, bi sedan caran bi balafiran, helîkopter û obusan bombe li qadên berxwedanê barand, nekarî ji derbên hêzên me bifilite.
Agahiyên berfireh ên çalakiyên serketî wiha ne; ku 23 dagirker hatin cezakirin, 10 dagirker birîndar bûn û 20 kîlo teqemenî, 2 fener û kamerayeke dagirkeran hatin desteserkirin.
Li Herêma Avaşînê
Di 14’ê gulanê saet di navbera 12.00-18.30’î de artêşa tirk a dagirker 13 caran bi çekên kîmyewî û teqemeniyan bombe li Qada Berxwedanê ya Werxelê barand û piştre xwest bi ber çeperên şer ve bi pêş ve biçe. Hêzên me bi çekên ferdî û bi çekên giran 4 caran li dagirkeran dan. Di encama vê destwerdana hêzên me de dagirker nekarî bi pêş ve biçin.
Li Herêma Zapê
Di 14’ê gulanê saet di 16.30’î de artêşa tirk a dagirker xwest ber bi çeperên şer ên li Girê Şehîd Hewrê yê li Qada Berxwedanê ya Şehîd Şahîn ve bi pêş ve biçin. Di heman demê de kûçikekî ku kamera danîbûn serî, şandin nava tunelên şer. Hêzên me bi rêbaza sabotajê li dagirkeran dan û 3 dagirker ceza kirin. Bi destwerdana hêzên me re dagirkeran 20 kîlo teqemeniya bi xwe re anî bûn li pey xwe hiştin û reviyan. Di encama vê çalakiyê de 3 dagirker hatin cezakirin, 20 kîlo teqemenî, 2 fener û kamerayeke datînin ser serî ji aliyê hêzên me ve hatin desteserkirin.
Di 14’ê gulanê artêşa tirk a dagirker li Qada Berxwedanê ya Çiyareş, piştî ku 10 caran bi balafirên şer bombe li çeperên şer ên li Girê Cehennemê barand, xwest ku ji du baskan ve ji bejahî ber bi çeperên şer ve bê û çekên kîmyewî bi kar bîne. Hêzên me dagirker xistin bin kontrolê û saet di 10.00 de bi çalakiya êrişê lê dan. Bi çekên ferdî û bombeyên destan mîna birûskê li dagirkeran hate xistin. Di heman demê de bi rêbaza sabotajê li komeke din a dagirkeran hate xistin. Di encama derbên xurt ên hêzên me de 5 dagirker hatin cezakirin. Dagirkerên ku derba giran xwarin û xwestin xwe vekişînin, vê carê danê êvarê derba duyemîn xwarin. Hêzên me ji nêz ve bi bombeyên destan û çekên ferdî derbeke giran li dagirkeran xistin. Di vî şerî de ku demeke dirêj dewam kir 13 dagirker hatin cezakirin, 10 dagirker jî bi giranî birîndar bûn.
Hêzên me bi ruhê êrişê yê Apoyî yê bilind bi ser dagirkeran ve çûn, derbeke mezin li artêşa tirk a mêtinger xistin. Di encama van çalakiyan de 18 dagirker hatin cezakirin, 10 dagirker jî birîndar bûn. Hêzên me dîtin ku artêşa tirk a mêtinger ku nekarî cenazeyên xwe ji herêmê bibe, parçeyên cenazeyên leşkerên dagirker xistin kîsên reş û ji zinaran avêtin.
Di 14’ê gulanê danê nîvro li Qada Berxwedanê ya Çiyareş, li dijî dagirkerên li dora çeperên şer ên li Kale çalakiyeke sabotajê hate lidarxistin. Di encama vê çalakiyê de 2 dagirker hatin cezakirin.
Di 14’ê gulanê saet di 13.00 û 19.00 de hêzên me bi eçkên giran li dagirkerên li derdora çeperên şer ên li Qada Berxwedanê ya Şikefta Birîndara xistin. Bi rengekî serketî li hedefên hatin diyarkirin, hate xistin.
Di 14’ê gulanê saet di 23.15 û 23.30’î de helîkopterên êrişê ji qadên di bin kontrola PDK’ê de ne hatin û xwestin ku bombeyan li çeperên şer ên li Girê Rûbar û Qada Berxwedanê ya Kurojahro bibarînin. Hêzên me li van helîkopteran reşandin û di encamê de helîkopterên êrişê neçar man ji herêmê vekişin.
Êrîşên hewayî û bejahî didomin
Artêşa tirk a dagirker bi dehan caran bi balafirên şer, helîkopterên êrîşê û obusan Herêmên Parastinê yên Medyayê bomberdûman kir.
Agahiyên têkildarê êrîşan wiha ne:
Di 13’ê gulanê de qada Girê Hefttebax a herêma Zapê bi balafirên şer hatiye bombekirin.
Di 14’ê gulanê quntarên Girê Şekîf ê herêma Xakurkê ji qereqolên li ser xeta sînor bi obus û hawanan hatiye bombekirin.
Di 14’ê gulanê de Girê Hakkarî yê herêma Metîna 5 caran ji aliyê balafirên şer ve hate bombekirin.
Di 14’ê gulanê de herêmên Çemço û Sîda yên herêma Zapê 5 caran bi balafirên şer hatiye bombekirin. Di heman rojê de herêma Çemço ji qereqolên li ser xeta sînor bi obusan hate bombekirin.
Di 14’ê gulanê de qadên Berxwedanê yên Çiyareş, Şikefta Birîndara, Kurojahro û Şehîd Şahîn ên herêma Zapê bi dehan caran bi helîkopterên êrîşê û obusên ku ji qereqolên li ser xeta sînor hatin avtin hatin bombekirin. Heman rojê herêmên Girê Cehenem, Saca, Karker, Girê Cûdî, Girê FM û Girê Amediye 19 caran bi balafirên şer hatin bombekirin.”
