Grevê vêşanîye bi îradeyêko pîl dewam kenî. Heme cayê welatî de grevî estî. Na çalakîya ke hetê Hemsereka Kongreya Komelê Demokratîk Leyla Guvene ra dîya destpêkerdene, şexsê aye de sere de hepisxaneyan dima ra Bakur û Başûrê Kurdistanî û Ewropa de virazîyena. 150 rojan ra zêde yo ke Leyla Guvene waştişanê xo ser o ya û bi îradeyêko pîl keyeyê xo de çalakîya xo domnena. Hepisxaneyan de zî rewşe cîya nîya; eynî waştiş ser o nika pêrûnê hepisxaneyan de 7000î ra zêde hepsîyê sîyasî grevê vêşanîye de yê. Mîyanê hepsîyan de kesê ke rewşa înan giran a zaf zaf ê. Grûba yewine ya ke 16ê kanûne de dest bi grevê vêşanîye kerdibî de hepsîyê ke 30 kîlo dayê, estî. Nê hepsîyan ser o hema zî tu çiyêk nêameyo vatene û Wezaretê Edaletî bêvengîya xo pawena. Nasir Yagizî zî çalakîya xo domneno; Yagizî Başûrê Kurdistanî de dest bi çalakîye kerd û çalakîya ci zî ha resena 140 rojan. Bitaybetî bêvengîya îdarekaranê Başûrê Kurdistanî tîya de zaf kewena çiman ver. Ewropa de zî çalakîya grevê vêşanîye dewam kena; mîyanê Ewropa de kesê ke wazenê vengê xo biresnî îdarekaranê Ewropayî 113 rojî yo ke grevê vêşanîye de yê. Labelê eynî bêvengî uca de zî esta. Parlamenterê HDPyî Dersîm Dage, Tayîp Temel û Murat Sarisaçî zî grevê xo domnenê; seke parlamenter ê labelê îdarekarî vera vengê înan de zî ker û lal ê…
Zilmê dewlete hetêk de la zilmo ke bêvengîye ra qewimyeno hetek de yo. Gere merdim naye baş bizano. Her çi ra ver zilmkar kesê bêveng ê; dewlete xura zilmkara pîle ya… Kurdî tu wext vera zilmêko winasî de bêveng nêmendibî. Bêvengîya nikayîne yena çi mana û çira endêk dewam kena, raşta ci merdim şaş maneno. Heta nika di rojeve pîya bibî; weçînayîş û grevê vêşanîye. Weçînayîş qedîya, labelê nîqaşê weçînayîşî hema zî dewam kenî. Demê weçînayîşî de xura grevê vêşanîye versîye de mendibî; bi nîqaşanê ke weçînayîşî ser o yenî kerdene rojeva grevê vêşanîye hêna versîye de manena. Wina aseno ke bi nê nîqaşan û bi nê rojevanê bînan serê bêvengîye yeno girewtene. Labelê no muamele zî raşt nîyo.
Hetek de grevê vêşanîye hetêk de çalakîyê fedaî… Hepsîyê ke bedenê xo vêşan verdenê, hêdî hêdî xo feda kenî. Çalakîya înan a fedaî hetêk de zî vera na bêvengîye de ya û gere merdim her çi ra ver nê çalakîyan wina bivîno. Hepsîyê ke canê xo kenî feda; helbet vera tecrîdî û polîtîkayanê zilmî de kenî feda, labelê heto bîn de zî wazenê ke bêvengîya şarî bişiknî. Waştişê înan no yo ke bêvengî bişikya û şar hînî bibo rayverê nê prosesê xoverrodayîşî. Helbet do bêvengî bişikya û şar do bibo rayverê prosesê xoverrodayîşî. Ê rojî nêzdî yê!
