Dagirkerê ke bi zordestîya xo bi se serran o warê pîrik û kalikanê ma de dayo ro û zengîniya sererd û binerdê warê ma yê hezaran serran talan kenê tehemulê destkewtişê Kurdanê Rocawanî nêkerd û rayêke bîne bi dagirkerdiş û êrîşanê xo yê Rocawanî ser de neyartîya xo ya Kurdan rê moşte ra. Helbet dewletê serdestî yê dinya zî semedê berjewendîyanê xo paştî û hetkarî danê nê dagirkeran ke rayêke bîne şimşêr û mertalê xo hemverê Kurdan antê û wazenê destkewtişanê ke şarê Kurdî bi gunya xo bidest vistê înan ra bidê girotişî û rayêke bîne Kurdan bê statu bidê verdayîşî. Senîn ke bi peymananê Qesra Şîrîne û Lozanî welatê Kurdan ame perçekerdişî û ancî sere de welatê Kurdan hetê emperyalîst û dagirkeran ra heme Rochilata Mîyanîne bi peymana Sykes-Pîcotî amî perçekerdiş û xespkerdişî eyro roc zî dagirker û emperyalîstî wazenê kayanê xo Kurdan ser de û heme Rochilata Mîyanîne ser de newe bikerê. La Kurdî bi têkoşîna xo ya hemverê terorî û dagirkeranê ke fînanskarê teroranê sey DAÎŞ’î yê heme dinya û dewletê serdestan ê dinya rê mojnenê ra ke ey go nêverdê ke sey se serrê verînan dagirkerî warê înan bi rehetî verdest bikerê.
Eyro dagirkeran şew û rocê xo kerdê yewî, bi destekê dewletê serdestan Kurdan ser de talan û qirkerdişê xo pêk anê û wazenê ancî înan bê statu verdê la eke Kurdî fek ezezîya xo ra verra bidê, fek hemkarîya xo ya dagirker û neyaranê Kurdan ra verra bidê û yewîtîya xo neteweyî awan bikerê ti qiwetêke nêşkeno statuya înan destê înan ra bigîro û yewîtîya înan go temînatê azadîya înan û welatê înan bo. Lazim o ey ê ke xo sey serek û rayveberê Kurdan vînenê nê bivînê û qebûl bikerê ke şarê Kurdî yewîtî wazeno û ro hêvîya înan o ke nê waştişê înan bi kongreyêke bêro têkuzkerdişî.
Ancî lazim o serek û rayveberê heme partîyan û saziyanê Kurdan bizanê ke heqê înan çinê yo ke dagirkeranê welatê ma heqdar an zî Kurdan rê bêzerar bimojnê ra. Çi heyf ke ma çend roc verî bî şahidê vengdayîşêke şermdar e yê Nêçîrvanî ke sey verfekê Erdoganî yan zî yê dewleta ey a dagirker e ke çapemenî de vecya! Bi ey vatişanê xo hemverê heme şaranê dinyaya ke dagirkerî û neheqîya na dewlete vînenê û Kurdan ser de sey dagirkerî qebûl kenê bi wijdanêke rehet pawitoxîya dagirkeran kerd! Eke bi vatişê ey bo meseleya Tirkiye Kurdan dir çinya(!) Eke meseleye aye Kurdan dir çinya bi artêşe xo û çeteyanê xo ya Rocawan de ro çi geyrena? Nêçîrvan bi nê vatişanê xo yan mojneno ra ke hemkarê dagirkeran o û xaîn û xêrnewaşteyê şarê Kurdî yo, yan zî semedê berjewendîyanê xo yê şexsî nêwazeno şarê Kurdî Bakur, Rocawan heta Rochilat de biersê heqanê xo yê merdimahî.
Wa Nêçîrvan bizano ke bi qaso ke nê vatişanê ey zerre şarê Kurdî de birîne kerde a endeyke tanq û topanê dagirkeran nêkerdê a. Wexta şexsê ke xo sey serek û rayveberê Kurdan mojneno ra vero ke pawitoxî dagirkeran rê bikero û dagirkerîya înan meşrû bimojno re lazim o pawitoxê heqanê merdimahî û neteweyî yê şarê Kurdî bo. Xoserîya şarê ma û welatê ma yewîtîya ma de ya ne di ezezî û hemkarîya dagirkeran de ya.
