Li Fransayê ku ji bo pêşî li belavbûna şewba Covîd-19 bê girtin mirov neçar in li malê bimînin, tê gotin ku tundiya li jinê zêde bûye.
Wezîrê Karên Hundir ê Fransayê Chrîstophe Canstaner ji qenala televîzyonê ya France 2 re axivî û diyar kir ku tundiya li nava malbatê di nava hefteyekê de li herêmên ku jenderme lê berpirsyar in bi rêjeya ji sedî 32 zêde bûye û got ku li qada ku Midûriyeta Emniyetê ya Parîsê lê berpirsyar e bi rêjeya ji sedî 36 zêde bûye.
Wezîr da zanîn ku li dijî vê şewba tundiyê li dê li dermanfiroşan sîstemeke hişyarkirinê bixin meriyetê û diyar kir ku bi rêya vê yekê ew dixwazin derfetê bidin jinan ên ku bêyî hevserên xwe çûne dermanfiroşan karibin îxbarê bikin.
Her wiha wezîr ragihand ku wan ferman dane hêzên ewlekariyê ku tavilê bikevin nava liv û tevgerê û destnîşan kir ku têkoşîna li dijî tundiya li ser jinê yek ji karê wan ê sereke ye. PARÎS
