Li Wanê etar û bêhnfiroş dest bi amadekariyên zivistanê kirin. Bêhnfiroş û etarvan, ji bo sermayê şîlan, lîmon, zencefîl, xavlêcan, darçîn hwd. pêşniyar dikin
Li Wanê bi hatina zivistanê re bêhnfiroş û etarvan jî dest bi amadekariyên xwe kirin. Etarvan û bêhnfiroş ji bo sermayê gelek nebatan pêşniyar dikin. Nexasim jî şîlan, zencefîl, xavlêcan û darçînê pêşniyar dikin.
Etarvan Bulent Orûç anî ziman ku rewşa karê wan baş bûye û diyar kir ku ji dêvla dermanên kîmyewî, divê dermanên xwezayî bên tecrîhkirin û wiha got: “Demsaleke biharatên li bêhnfiroş û etarvanan tên firotin tuneye. Her wextî tên xwarin. Lê herî zêde jî zivistanê. Ji bo quweta bedenê divê zencefîl, darçîn, xavlêcan, şîlan, lîmon û hwd. bên kelandin û vexwarin.”
Dermanên xwezayî
Di axaftina xwe de Orûç ji bo sermayê giyagewrikê pêşniyar dike û wiha didomîne: “Lê mixabin piraniya mirovan ji dêvla dermanên xwezayî dermanên kîmyewî dixwin. Ev jî paşê dibe sedema nexweşînên din. Divê mirov ji dêvla dermanxaneyan, etarvanan tercîh bikin.”
Orûç bal kişand ser berên mozan jî û got ku divê ji bo parastina li hemberî nexweşînan berên mozan ên wekî hungiv bên bikaranîn.
Amadekariyên ji bo zivistanê
Her wiha Orûç ji bo bikaranîna nebatan jî ev tişt anî ziman: “Divê mirov berî bikaranînên baş lêkolînê bikin. Mesela ger darçîn baş be, divê pêşî lêkolîn bikin û paşê bikar bînin. Niha zivistan hatiye. Lê divê di vê demsalê de her tişt neyê bikaranîn.” WAN
