Şaristanê Zurichî yê Swîsre de seba vîrameyîşê şehîdanê Qirkerdişê Parisî Sakîne Cansiz, Fîdane Dogan û Leyla Şaylemez Festîvala Cinîyan a Sakîne Cansiz a 10. bi şîarê ‘Jin, Jiyan, Azadî’ ameye kerdene.
Warê festîvale bi fotografanê cinîyan ê şehîdan xemilîya. Endama YJK-Syî Ozene Aytaç qiseykerdişê akerdişî kerd û da zanayene na festîvale ruh û têkoşînê Sakîne Cansiz temsîl kena û vat: ”Şerê aye seba cinîyan bi. Têkoşînê Sakîne Cansiz nasnameyêk o.”
Festîvale de sey Nagîhane Akarsel, Evîne Goyî, Hevrîne Xelef, Jîyane Tolhildan, Yadê Eqîdê, Yûsra Derwêş, Leymane Şiwêş cinîyê ke hetê dewleta tirke ra ameybî qetilkerdene ameyî yadkerdene.
Nameyê TJK-E ser o Besîme Konca vejîyaye sehne ser û qisey kerd. Konca vat: ”Eke dewleta tirke cinîyan ê serkêşan kena hedef ganî ma naye ser o kêmasîya xo bivînê. Ganî ma vera hêrişanê dewleta tirke têkoşînêkê xurtêrî bikerê û yewîya kurdan bîyarê ca.”
Koordînasyonê KJKyî zî mesajêk şawit festîvale. Mesajê KJKyî bi kilmî wina yo:
”Dewleta tirke estbîyayîşê xo qirkerdişê kurdan ser o nayo ro û hedefê ci yê verênî zî cinîyê kurd ê. Dewleta tirke vera cinîyan ê kurdan polîtîkayanê şerê taybetî ana ca.AKP-MHP seba caardişê nê polîtîkayan seferber bîyo. Şexsê Rayber Apoyî de hêzanê komplogerab cinîyê kurdî, şarê kurdî û şerwanê ma hedef kerdî. Rayberîye 25 serrî yo Îmrali de mîyanê xoverdayîşêkê xurtî de ya. Ma sey cinîyan ci rê minetdar ê coka ma do tecrîdî bişiknê û ey azad bikerê.
Ewro gerîlayê Kurdîstanî koyan de polîtîkayanê îşxalî pûç kenê. Hînî polîtîkayê îşxal, qirkerdiş, xayînî û namerdî apey de mendî. Stratejîya ma ya kurdanê azadan û cinîya azade rew ra ser kewte. Ma sey KJKyî venga pêro cinîyan, şarê ma, ciwananê ma û dostanê ma danê ke hêz bidê têkoşînî. Têkoşînê cinîyan o rûmetên û têkoşînê Rayraşîyayîşê Rayberîye serkewtişî heq keno. Ma serê xeta têkoşînê cinîyan, xoverdayîşê gerîlayan û Rayber Apoyî de şorê û ser bikewê.”
Festîvale de hunermendî Bermale Çem, Jin Ma, Yelda Abbsaî, Medî, Koroyê Cinîyan ê Baselî, Koroyê Domanan, Elenora, Koma Govendan û Koma Dansê Flamenkoyî vejîyayî sehne ser û xeyma dengbêjan de zî cinîyan ê denbêjan kilamê xo vatî. ZURICH
