Operasyonê Xurtkerdişê Asayîşî yê vera DAIŞî û komanê sûcan ê organîzeyan roja 9. de yo. Ma prosesê operasyonî binê hîrê sernameyan de ercna.
Merkezê Îrtîbatî û Çapemenîye yê Hêzanê Sûrîyeya Demokratîke (HSD) 27ê tebaxa 2023yî de vera cerganê DAIŞî û komanê sûcan ê organîzeyan herêma Dêra Zorê de Operasyonê Xurtkerdişê Asayîşî dabi destpêkerdene. Operasyon bi beşdarîya Hêzanê Asayîşî roja 9. de ya. Heta nika çarçewa operasyonî de tewr tay 50 sûcdarî û cergê DAIŞî tepişîyayî.
Dêra Zorê hetê Meclîsê Sivîlî û Meclîsê Leşkerî ra yena îdarekerdene. Operasyonê Xurtkerdişê Asayîşî armanc keno ke hucreyanê DAIŞî yê nimiteyan bitepişo. HSDyî 23yê adara 2019î de qezaya Baxozî ya Dêra Zorê azad kerdbi. Bi nê hawayî DAIŞî kelaya xo ya peyêne vînî kerde. La hucreyanê nimiteyan hêrişê vera risîpîyan û şarî zêdînayî.
Cerganê DAIŞî ra ber komê sûcan zî hedefê HSD û Hêzanê Asayîşê Zereyî de yê. Nê komî petrol, genim, berhemanê Dêra Zorê diznenê benê û madeyanê narkotîkî roşenê. Fermandaran ra Ehmed El Xebil (Ebû Hewla) zî nê sûcan ra tepişîya. Coka nameyê operasyonî ‘Xurtkerdişê Asayîşî’ yo.
Dima ke operasyon dîya destpêkerdene tay terefan operasyon sey ‘şerê ereban û kurdan’ vist rojdem û waşt ke fîtne vejê, operasyonê serkewteyî asteng bikerê. La HSDyî û şarê herême vera ney tedbîrî girewtî û na polîtîka pûç kerde.
Dima ke qiseyê fîtneyî zaf vila bîyê HSDyî eşkerayîyêke daye û vat: ”Antîpropagandayê ke ameyî kerdene waştişê ci oyo senî ke mabênê hêzanê ma û eşîranê ereban de pêkewtiş est o, wina ramojnê. 2013yî ra nata tay hetî wazenê ke şerê mabenê HSD û DAIŞî sey şerê kurd-ereban ramojnê. Raştîye de mabênê şarê ereb û kurdan de problem çîn o. Laj û kênayê ereb, kurd, suryanî û armenî heme dezgehanê Îdareyê Xoserî û HSDyî de pîya têkoşîn kenê û semedê pawitişê herra ma gonîya xo rişnenê. HSD bi xo îspatê yewîya şaranê herême û bitaybetî yewîya şaranê ereb û kurdan o. Coka êyê ke yewîya ma nêwezanê wazenê na yewîye bixeripnê.
Ma hêvî kenê ke şarê ma nê kayan vîneno û pa nêxapîyeno. Dewleta tirke ya îşxalkere û çeteyanê ci no sey firsetî dî û pan hetan ra hêrişê xetanê pawitişî yê Meclîsê Leşkerî yê Minbicî kerd. Şervananê Meclîsê Leşkerî yê Minbicî bi hewayêkê qehremankî cevab da. Ma veng dnaê ke sere de şarê ma yê Dêrazorî heme şarê herême wa nê kayana mexapîyo. No şer mabênê HSD û çeteyanê dewleta tirke û çeteyanê pabesteyê dezgehanê asayîşê hukmatê Şamî de yeno kerden. Mabênê HSD û eşîranê herême de problem çîn o.”
Pêro hêzê ke binê sîwana HSDyî de yê, nê operasyonî de cagênê. Hêzê erebî yê HSDyî Hêzê Humat Ek Cezîrê zî operasyon de rolê pîlî anê ca. DÊRA ZORÊ
