Endama Konseya Serokatiya Giştî ya KCK’ê Sozdar Avesta beşdarî bernameya taybet a Stêrk TV bû û bi wesîleya 8’ê Adarê Roja Jinan a Cîhanê asta rêxistinî ya jinan nirxand.
Sozdar Avesta di destpêka axaftina xwe de şehîdên Garê û şehîdên Kurdistanê hemû bi rêzdarî bi bîr anî û wiha got: “8’ê Adarê careke din li her devera cîhanê ji aliyê bi sed hezaran jinan ve hate pîrozkirin. Li cîhan û Kurdistanê, bi hêrs û ruhê raperînê jin daketin qadan, li ber sîstema baviksalarî û mejiyê wê rabûn. Bi navê jinên li çiyayên Kurdistanê yên azad têdikoşin, wan hemûyan silav dikim. Têkoşîna wan pîroz dikim û di meşa azadiyê ya jinan de serketinê dixwazim. Em; jinên kurd minetdarê Rêber Apo ne. Rêber Apo xwedî ked û hewldaneke mezin e ku jinan gihand vê astê.”
Têkoşîna jinan bi Rêber Apo bi wate bû
Sozdar Avesta diyar kir ku têkoşînên jinan ên mezin ên dîrokê, jinên berxwedêr û têkoşer bêguman ji bo wan jî weke mîrateya têkoşînê ne û ev tişt anî ziman: “Ev têkoşîn bi felsefe û keda Rêber Apo bi wate bûn. Li gel zext û êrîşên rejîma faşîst a AKP-MHP’ê, jinan di 8’ê Adarê de li Kurdistan û Tirkiyeyê bi coş û tevlibûneke mezin çalakî kirin û bi jinên cîhanê re dengê xwe bilind kirin. Dema ku mirov ji aliyê giştî ve binirxînin wê were dîtin ku îradeya jinan, helwesta jinan a li dijî desthilatdariyê û hêrsa jinan xwe nîşan daye. Vê bawerî, hêrs û biryardariyê desthilatdarî û saziyên wê hejandiye. Jinan ev yek baş dîtin: xwedî wê hêzê ne ku eger bixwazin dikarin bi ser bixînin.”
Avesta bal kişand ser têkoşîna gerîlayên YJA Starê ku bi dehan sal in li çiyayên Kurdistanê têdikoşin û destnîşan kir ku bi vê têkoşîna xwe, ji bo têkoşîna azadiyê ya jinan bûn hêvî.
Di axaftian xwe de Avesta ragihandin ku li pêşiya vê tabloya bi heybet tu hêz êdî nikare bisekine û wiha domand: “Jin êdî bi têgihiştî, rêxistinî û bi felsefeyeke jiyana azad tevdigerin. Divê her kes êdî vê yekê baş bibîne. Em di wê baweriyê de ne ku coş û rêxistiniya di 8’ê Adarê de derkete holê eger hîn bi xurtî dewam bike wê bigihêje encamê. Girîng e jin hemû vê tabloyê baş bibînin. Ev yek derfetên têkoşîna hevpar diafirîne. Pêwîst e ev rewş bi têkoşîna jinan a hevpar a li Kurdistanê bê tacîdarkirin.”
‘Dem hatiye ku mêr jî êdî xwe ji nexweşiyên klasîk rizgar bikin’
Sozdar Avesta destnîşan kir ku aliyekî din jî ew e ku li her devera têkoşîna jinan heye divê xweparastin jî bê xurtkirin û ev yek weke mijareke jêneveger bê dîtin û jin li her derê xwe biparêzin.
Endama Konseya Serokatiya Giştî ya KCK’ê Sozdar Avesta ragihand ku divê êdî mêr jî xwe ji nû ve binirxînin, sererast bikin, xwe ji nexweşiyên mêr ên berê rizgar bikin û wiha pêde çû: “Tenê bi vî rengî tevlibûneke xurt li têkoşîna azadiyê dikare bê kirin. Divê êdî bes aqil bidin jinan. Pêwîst e bes bêje ku divê jin çawa tevbigerin, çawa xwe bi rêxistin bikin. Dema vê êdî qediya ye. Di vê asta têkoşîna jinan de em dibînin ku hin hêzê desthilatdar hewl didin têkoşîna jinan di nava pergala xwe ya desthilatdariyê de bihelînin. Bêguman jin vê dibînin. Bi qasî ku careke din nekevin xefika mêr, rêxistinbûyî ne. Ji ber vê yekê divê mêr bi rêzdarî û hurmet nêzî îrade, rêxistinî û têkoşîna jinan bibin. Mêr çiqasî karibe vê bike wê xwe ji zîhniyeta heyî rizgar bike û gavên nû biavêje. Li ser vê bingehê dikare bi jinan re têkiliyeke hîn bi wate û rast deyne.”
Bandora berxwedana Garê li coşa 8’ê Adarê
Sozdar Avesta destnîşan kir ku di vir de têkoşîna azadiyê ya jinên Kurdistanê mînakeke mezin e û wiha got: “Em dibînin ku bi berdêlên mezin têkoşiyan û cihê xwe di nava tevgera azadiyê de girtin. Bi hezaran hevrêyên ku li ser bingeha rast a bi jinan re di nava têkoşîna mezin de têkoşîneke hevpar meşandine, silav dikim. Herî dawî li Garê li dijî plana dagirkeriyê ya hikûmeta Erdogan a faşîst, têkoşîn û lehengiya hevrê Şoreş û hevrêyên wî yên şehîd bûn, rêya jiyana azad nîşan dan. Di coşa 8’ê Adarê de bandoreke mezin a lehengiya li Garê heye. Ji ber vê yekê divê her kes vê tabloyê bibîne û xwedî lê derkeve.”
‘Li ser bingeha ruhê ku di 8’ê Adarê de afirî divê her kes biherike qadên Newrozê’
Avesta di axaftina xwe de bal kişand ser Newroza 2021’ê û destnîşan kir ku Newroza îsal dê bi têkoşîneke mezin pêk were û ev tişt anî ziman: “Zilm û êrîşên faşîzmê zêde bibin jî divê em paşve gavê neavêjin. Di vê demê de ku berê me li Newrozê ye, girîng e em têkoşînê mezintir bikin û hîn bi rêxistinbûyî bikin. Mîna her carê wê jin pêşengiyê ji vê yekê re bikin.”
Sozdar Avesta destnîşan kir ku îradeya jinan a li Kurdistanê bi taybetî jî ya li Rojava dê di vê Newrozê de hîn bi xurtî xwe nîşan bide û wiha domand: “Têkoşîna li çar parçeyên Kurdistanê û derveyî welat hate nîşandan, wê Newroza îsal bike Newroza azadiya Rêber Apo. Em bi vê bawer in. Di vê pêvajoyê de divê tu astengî neyê naskirin. Divê kes li astengiyekê nealiqe. Ji ber ku di 8’ê Adarê de me dît ku jinan hemû astengî ji pêşiya xwe rakirin.”
Her wiha Sozdar Avesta di dawiya axaftina xwe de bang li jin û ciwanên Kurdistanê, gel û dostên kurdan kir ku li ser bingeha ruhê ku di 8’ê Adarê de afirî biherikin qadan û axaftina xwe wiha bi dawî kir: “Ji niha ve Newrozê li tevahiya gelê Kurdistanê pîroz dikim. Bi taybetî Newrozê li Rêber Apo, li hevrêyên li zindanan li ber xwe didin, li şervanên HPG û YJA Starê û milîtanan hemûyan pîroz dikim.” BEHDÎNAN
