Navenda Nûçeyan |
Partiya Jiyana Azad a Kurdistanê (PJAK) Komelgeha Demokratîk û Azad a Rojhilatê Kurdistanê (KODAR) derbarê îdiayên têkildarî jiyana Rêberê Gelê Kurd Abdullah Ocalan de, daxuyaniyek nivîskî belavkirin.
Di daxuyaniya PJAK û KODAR’ê de ev tişt hatin gotin:
“Di 14’ê Adarê de hinek nûçe li ser jiyana Rêberê Gelê Kurd Abdullah Ocalan belavbûn, ev yek bû sedema nerazîbûna gelê kurd û ji bo vê gelê kurd daketiye qadan. Ev 22 sal in Rêber Apo di zindana Îmraliyê de dîl tê girtin û dibin tecrîdek giran de ye. Ji bo parastin û mafê gelê kurd, bûye bingehê têkoşîn û serkeftinê. Tevî hemû tecrîdan, Rêberê Gelê Kurd di pêşengtiya gelan û afirandina jiyana azad de dewam dike. Yanî girtîgeh û tecrîd nikare peywendiya navbera Rêber Apo gelê kurd de qût bike.
Ji sala 2011’an ve tecrîdek girankirî li ser Rêber Apo tê meşandin û her ku diçe dijwartir dibe. Rêber Apo di zindana Îmraliyê de diyarkiriye ku egera her bûyerek metirsîdar a li ser jiyana wî, divê her kes bizane bi qestî tê kirin. Rêber Apo gotiye hemû tiştên biqewimin, bi plan, bername û di çarçoveya şerê taybet de tê kirin.
Belavkirina nûçeyên bi vî awayî ya ji aliyê saziyên girêdayî faşîzma dewleta tirk, ji bo têkdan û cezakirinê ye. Bêguman gelê kurd bi Rêber Apo re pêngavên serekî yên ber bi netewbûnê ve avêtine û berdewam dibe.
Piştî ragihandina kampanyayên ji bo azadiya Rêber Apo, pêşwazî, tevlibûna gelê kurd û gelên din ên herêm û cîhanê, zexta li ser dewleta tirk jî zêde kiriye. Diyar bû gelên cîhanê tecrîdê weke li ser xwe dibînin, ji ber Rêber Ocalan nirxek mirovayetî û hevbeş a gelan e. Her kes lê xwedî derdikeve.
Em ji bîr nakin, dema gelê kurd li rojhilatê Kurdistanê di sala 1999’an de dijî komploya hemberî Rêber Apo daket qadan û heya niha ev berxwedan dewam dike. Jiyan û tenduristiya Rêber Apo ji bo gelê me xeta sor e. Gelê me bi heman hest û têgihiştinê, niha jî dijî hemû êrîşên ser jiyan û hebûna Rêber Ocalan amade ye.
Li ser vî bingehî em bang li gelê xwe yê li rojhilatê Kurdistan û dervey welat dikin, bi ruhê serhildanên sala 1999’an xwedî li Rêber Apo derbikevin. Xwedî helwest bin û yekitiya xwe ya neteweyî ji bo têkşikandina eniya faşîst û dîkdatoriyê nîşan bidin.”
