Li başûrê Kurdistanê bi dehan sal in baregehên leşkerî yên dewleta tirk hene. Salên dawî hem baregehên leşkerî hatin zêdekirin, hem jî qadên dagirkirî berfireh bûn.
Ji 23’ê Nîsanê û vir ve bi taybetî li ser herêmên Metîna, Avaşîn û Zapê êrîşên dagirkeriyê têne kirin.
Bi rêk û pêk êrîş li gundan tên kirin û têne valakirin. Hikûmeta Herêma Federal a Kurdistanê jî li ber vê yekê bêdeng e.
Li dijî êrîşên dagirkeriyê, nerazîbûna li başûrê Kurdistanê mezin dibe. Partiya Komunîst a Kurdistanê (KKP) li dijî êrîşên dagirkeriyê û li hemberî hebûna leşkerî ya li herêmê, li ber Parlamentoya Hewlêrê çalakiyeke şermezarkirinê li dar xist.
Li pêşiya parlamentoyê bi navê çalakgeran daxuyaniyek hate dayîn û wiha hat gotin: “Peymana navbera Iraqê û dewleta tirk a li ser ewlehiya sînorê divê bê betalkirin û li dijî dagirkeriya dewleta tirk sînor bê parastin. Divê dewleta tirk ji başûrê Kurdistanê bê derxistin.”
Di daxuyaniyê de binpêkirina hiqûqa navneteweyî, xisara li xwezayê hatiye kirin û birîna daristanan hat bibîranîn û hat ragihandin ku ev yek sûcê şer e.
Çalakgeran xwestin ku xweza bê parastin û ji dewleta Îranê jî hate xwestin ku dawî li binpêkirinan bîne.
Di dawiya daxuyaniyê de wiha hat gotin: “Ji ber rêveberiya nebaş a başûrê Kurdistanê, maf û azadî rojane têne binpêkirin. Mûçeyên xebatkar û teqawîtbûyiyan têne kêmkirin. Her wiha buhayê alavan hatiye zêdekirin û bac zexteke giran li şêniyan dike.”
Partiya Komunîst piştî daxuyaniyê daxwazên xwe yên li dijî êrîşên dagirkeriyê û yên ji bo mafên karkeran radestî parlamentoyê kir. HEWLÊR
