Însiyatîfa Femînîst a Swêdê têkildarî berxwedana grevên birçîbûnê kul i dijî tecrîdkirina Ocalan hatine destpêkirin, daxuyaniyek parve kir û pêşniyar kir ku delegasyoneke ji wezîrên Yekitiya Ewropayê pêk tên biçin serdana Leyla Guven
Partiya bi navê Însiyatîfa Femînîst a Swêdê, pêşniyar kir ku delegasyoneke ji wezîrên Yekitiya Ewropayê pêk tê, biçin serdana Leyla Guven.
Berdevka partiyê ya Berpirsyara Polîtîkayên Li Dijî Nijadperestiyê Carmen Blanco Valer û berdevka Polîtîkaya Derve Jamie Gomez, di derbarê berxwedana grevên birçîbûnê ku li dijî tecrîdkirina Rêberê Gelê Kurd Abdullah Ocalan pêk tên de daxuyaniyek parve kir.
Daxuyanî di rojnameya rojane ETC’ê de bi sernavê ‘Tevkariya bi Leyla Guven û girtiyên siyasî re’ hate weşandin. Di daxuyaniyê de hate ragihandin ku hikûmeta Erdogan bi rêk û pêk mafên tirkên mûxalîf û gelê kurd binpê dike.
Di daxuyaniyê de hate diyarkirin ku Guven ji 7’ê Mijdarê heta niha di grevê de ye û wiha hat gotin: “Lîderê PKK’ê Abdullah Ocalan di bin tecrîdeke giran de ye, destûr nayê dayîn ku bi malbat û parêzerên xwe re hevdîtinê bike. Ev binpêkirina Peymana Mafê mirovan a Ewropayê ye. Ne tenê binpêkirina mafê kesekî ya tevahiya gelê kurd e. Ev feraset, xizmet ji çareserkirina pirsgirêka kurd re nake.”
Di daxuyaniyê de hat destnîşankirin ku tenduristiya Guven di asteke gelek krîtîk de ye û hindik maye ku dîtin û bihîstina xwe winda bike, ango di navbera jiyan û mirinê de diçe û tê û daxuyanî wiha bi dawî bû: “Înîsîyatifa Femînîst, ji tenduristiya Leyla Guven û girtiyên din bi fikar e. Lewre em ji hikûmeta Swêdê dixwazin ji bo ku mafê mirovan a girtiyan bixe bin garantiyê ji hêla dîplomatîk ve her cure amûrê bikar bîne û divê delegasyoneke ku ji wezîrên welatên Ewropayê pêk tê biçe serdana Leyla Guven.” STOCKHOLM
