Namzedê HDPyî yê seba hemserekîya Şaredarîya Qersî Ayhan Bîlgenî vat, “Cimatê Tirkîya wazeno ke vurîyayîş bibo û HDP nê waştişî rast fam keno. Bê ke bikewo mîyanê hesabanê qijkekan, bi fedakarîye keno ke cewab bido waştişê cimatî.”
Namzedê HDPyî yê seba hemserekîya Şaredarîya Qersî Ayhan Bîlgenî qisey kerd. Bîlgenî sere de bale ante serê grevê vêşanîye yê hemsereka KCDyî û parlamentera HDPyî ya Colemêrgî Leyla Guvene ke seba wedartişê tecrîdî 88 rojî yo bi hawayêkê bêdem û bêagêrayîşî grevê vêşanîye de ya.
Bîlgenî vat, nêno qebûlkerdene ke îqtîdar û Meclîs nê halî nêdîyayîşî ra bêro û ard ziwan ke waştişê Leyla Guvene demokrasî û aşitîya cimatî dir eleqedar o. Bîlgenî dewamê qiseykerdişê xo de vat, “Halêko cidî yo ke yew parlamentere çalakî virazena. Na çalakî hemverê bêhuqûqî û sîstemo keyfî yê Îmraliyî de ya. Jest yan zî hewlîyêk nêpawena. Tena wazena ke qanûnî bêrê bicaardene. No waştiş zî bêguman do bi ser bikewo.”
Bîlgenî weçînitişo cayî yê 31ê Adare zî ercna û ard ziwan ke weçînitiş atmosferêkê alelade û demokratîkî de nêvirazêno û vat, “Bêguman weçînitiş seba ma muhîm o û netîceyê ci zî do tesîrê qedera Tirkîya bikero. Bi na bawerîye ma do tê bigêrê. La ma çirey bi mezgê partîyanê sîstemî tê nêgêrenê.”
Bingeyê sîyasetî partî nêya, cimat bi xo yo
Bîlgenî derheqê qerarê HDPyî yê seba nêramotişê namzedan ê Stenbol, Îzmîr û Edeneyî de zî qisey kerd û bale ante ke nuqteya bingeyêne ya sîyasetî partî nêya, cimat o.
Bîlgenî vat, “Karê partîyan o ke bendewarîyanê cimatî rind fam bikerê, meylê stratejîk û derg ê cimatî bifikrê û nê bingeyî ser o wezîfeyê xo plan bikerê. Eke merdim sîyasetî seba peydakerdişê meqamêkê şexsan yan zî perçeyêkê cîyakerdişî yê mabênê partîyan bivîno, a game do merdim bikewo mîyanê xeletîye. Cimat weçînitişan de tena îqtîdarî nê, ge-gane partîyanê muxalefetî yê ke şaşîyan kenê zî ceza keno. Cimatê Tirkîya wazeno ke vurîyayîş bibo û HDP nê waştişî rast fam keno. Bê ke bikewo mîyanê hesabanê qijkekan, bi fedakarîye keno ke cewab bido waştişê cimatî ”
Bîlgenî ard ziwan ke eke no qerarê HDPyî çarçiwaya mentiqêkê aleladeyî ya partîyêk de bêro ercnayene do şaş bibo û vat, “Peynîya peynî nuqteya bingeyêne ya sîyasetî partî, rayber yan zî şexis nêyo. Merkezê sîyasetî cimat o, ganî ma bi nê hawayî bifikrê û tê bigêrê.”
Înan Qers mehkumê şertanê dewrê mîyanenî kerdo
Ayhan Bîlgeno ke weçînitişanê cayîyan de pîya bi Hatîce Orhankazî namzedê HDPyî yê hemserekîya Şaredarîya Qersî yo, xebatê xo yê seba weçînitişî zî vêşî kerdî.
Bîlgenî bale ante serê mîrasê tarîxîyî yê xurtî yê Qersî ser û bi vîr ard ke verê se serre ke hewna Komare awan nêbîbî, Qers hetê şûrayêka hempare ra ameyêne rayraberdene ke na şûra Malakan, Rûs, Ermenî, Rûm, Azerî, Terekeme, Kurd, Tirkmenan ra ameyêne pê.
Bîlgenî da zanayene, Qers referansanê tewr muhîman ê kulturê demokrasî yê herême ra yo û wina dewam kerd: “Îdareyê ci yo cayî heta nika hetê CHP, AKP û tewr peynî zî hetê MHPyî ra ame rayraberdene. Partîya tena ya ke Qers de nêamîya ceribnayene û alternatîfa tena ya HDP ya. Bajar agêrayo sergoyî. Merdimî bi asanî nêeşkenê vejîyê kuçeyan. Ne rayîrê dewan estê, ne zî rayîrê mabênê bajaran. Înan bajar mehkûmê şertanê dewrê mîyanênî kerdo. Bêkarî, feqîrî xeylî zêde ya, xizmetê weşîye tam bica nênê. Saredarîye fînaya mîyanê leymê rantî. Halêkê winayênî de şar wazeno ke vurîyayîş bibo. Bêguman do weçînitiş de cewabê nê halî bêro dayene. HDP weçînitişanê 2014î de Qers de partîya çarine bîye. Serra 2015î ra nata ez tîya xebitêna. Nika zî eleqeyêk û paştîdayîşêko pîl seba ma esto.” STENBOL
