Avûkat Îbrahîm Bîlmezî vat komploya 9ê Teşrîna Verêne bi tecrîdê Îmrali û neçareserkerdişê meseleya Kurdî dewam kena û Îmrali de huqûq nêno caardene. Coka Tirkîya nêeşkena bibe demokratîk, Rojhelato Mîyanenî zî nêeşkena kaosî ra bixelisîyo
7ê Tebaxe ra avûkatê Buruyê Huqûqî yê Asrinî nêeşkenê Rayberê Şarê Abdullah Ocalanî reyde pêvînayîş bikê. Avûkatanê Buroyê Huqûqî yê Asrinî ra Îbrahîm Bîlmezî derheqê tecrîdê Îmrali yê verba Abdullah Ocalanî de ANFrê qisey kerd.
Îbrahîm Bîlmezî vist vîrî ke heqo tewr tabîî yo ke avûkatî bieşkî muwekîlê xo bivînê, labelê 7ê Tebaxe ra nata ê her hewte Çarşeme û Îne semedê zîyaretî muracat kenê la heme muracatê înan bêcewab ameyî qedexekerdene û va: “Îmrali de mekanîzmayêko keyfî û bêhuqûqiye esto, merdimî wayîrê heqanê merdimîye nê, herkes ganî bieşkê nê heqanê xo bixebitnê. Labelê wexto ke babete Birêz Ocalan beno heyf ke serra 1999 ra nata heqê tabîîyî tim ameyî binpaykerdene. No mekanîzma bi xo tecrîdkerdiş o, tecrîdkerdişê Ocalanî verê Îmrali, Sûrîye de dest pêkerd. Astengkerdişê pêvînayîşê ey ê nikayênî netîceyê nê sîstemê tecrîdî yo. Sîstemê tecrîdî nika zî yeno xebitnayene.
‘Tirkîya demokratîk nêbena, çunke…’
Tirkîya demokratîk nêbena, çunke bingeyê aye de neçareserkerdişê meseleyê Kurdî esto. Tirkîya de rejîmê şexsêkî saz bîyo. Meseleyê Rojawanî zî eleqeyê ci bi meseleyê Kurdî esto, rêxistînbîyayîşê alternatîfî yê têgêrayîşê Kurdî Tirkîya eciz kerde. Eke Tirkîya meseleya xo ya Kurdî çareser bike û heqanê şarê Kurdî bide înan, ganî nêzdîya rêxistinbîyayîşê Rojawanî nêbe û seba naye her çî ra ver tecrîdê Îmralîye biqedne.”
Bîlmez bale ant ser kaosê Rojakewtena Mîyanêne û va: “Eke wextê xo de seba çareserîyêka haştîyane û demokratîke dormeyê masa de bironiştêne, rewşe ewro cîya bibîyêne. Rojhelato Mîyanênî de kaosêk esto, la eke Tirkîya meseleya Kurdî bi perspektîfê demokratîkî çareser bikerdêne, beno ke meseleya Sûrîye zî çareser bikerdêne. Heta ke tecrîd nêqedîyo, kaos zî nêqedîyeno.” STENBOL
