Çarçewa Dewaya Kobanê de 24ê ci tepişteyî 108 sîyasetmedarê kurdî yenê muhakemekerdene. Roniştişê bire yê Dewaya Kobanê 17ê nîsane de do bêro kerdene. Dozgerîye wazena ke Selahattîn Demîrtaş û Fîgene Yuksekdag zî tede dewa de 36 sîyasetmedaran rê cezaya muebede wa bêra dayene.
Hemvervatoxa Komîsyonê Huqûqî yê DEM Partî Sevda Çelîk Ozbîngol derheqê prosesê dewa de ANFyî rê qisey kerd.
Sevda bale ante ser ke na dewa sîyasetê kurdan ra qesasê îqtîdarî ya û vat: ”Na dewa de huqûq yeno binpaykerdene. Xora na dewa seba waranê sîyasetan malzeme bîye. Rîyê na dewa ra sîyasetmedarê kurdî yê bêsûcî zîndanan de tepişîyenê. Bira ke Dewaya Kobanê ser o bigêrîya, do morê xo bida seserra diyîne ya komare ro. Bi na bire dewlete zî do bire bida ke polîtîkayanê tekperestan rê dewam bikera yan zî do demokratîk biba
Hetê bînî ra ma do bi na bire bivînê ke meseleya kurdan de çareserîye do bêra caardene yan ney. Xora bi na dewa sîyasetê kurdan yeno krîmînalîzekerdene. Rayaumûmîye wina pawena ke na dewa ra birêka raşte do vejîya û sîyasetmedarî vera bidîyê.”
Sevda dîyar kerd ke bire se bena wa biba DEM Partî do têkoşînê xo rê dewam bikera û vat: ”Îqtîdar keno ke huqûq bikero parçeyê xo û muhakemekerdişê xoserî qetil bikero. Rayaumûmîye na bêhuqûqîya dewa qebul nêkena. DEM Partî seba çareserîya meseleya kurdan û demokratîkbîyayîşê kurdan têkoşînê xo rê do dewam bikera. No têkoşîn salonanê roniştişanê dewa de zî yeno kerdene.”
