Bi qerarnameyê Serekkomarîye faîlanê Qirkerdişê Madimakî yê Sêwasî ra Ahmet Turan û Hayrettîn Gul bi bahaneya ke nêweş ê vera dîyabî. La zîndanan de hema zî tewr tay hezar û 517 tepişteyê nêweşî est ê ke nînan ra rewşa 651 tepişteyan giran a.
Hetê bînî ra Heyetê Çimdarîya Îdarî yê zîndanan bi taybetî tepişteyê ke cezaya înan a 30 serran qedîhyaya, bi bahaneya ke poşman nêbîyê vera nêdano.
Îdarekara Merkezê Pêroyî yê Komeleya Heqanê Merdiman Nuray Çevîrmene derheqê babete de ANFyî rê qisey kerd.
Çevîrmene dîyar kerd ke bira efûkerdişê Ahmet Turan û Hayrettîn Gulî bi temamî polîtîk ê û vat: ”Vera tepişteyanê sîyasîyan cîyakerîyê pîlî yenê kerdene. Prosesê janê Korona de qanûnê înfazî de vurîyayîş qewimîyabi la no qanûn zî seba tepişteyanê sîyasîyan nêame caardene. Prosesê janî de tepişteyê sîyasîyî mîyanê şertanê hîna xiraban de tepişîyayî. Tirkîya de binê nameyê TMKyî de tepişteyan rê caardişê xirabî yenê ferzkerdene. Tepişteyê sîyasîyî zîndanan de raştê îşkenceyan yenê. Birê Heyetê Çimdarîya Îdareyî normal nîyê.”
Çevîrmene îfade kerd ke mehkeme, hakîm û dezgehê hukmkerdişî biranê îdareyanê zîndanan tesdîq kenê û vat: ”2021î ra nata înfazê 313 tepişteyan pê biranê winayênan ameyî vêşnayene. Teyna 40 tepişteyê ke 30 serran ra zêdeyêr zîndan de bîyê vera dîyayî. Yanî tepişteyan rê îşkence û teda yenê kerdene. Birê Heyetanê Çimdarîya Îdareyî nê qanûnî yê ne zî huqûqî yê. Nê heyetî seba ke tepişteyan rê poşmanîye ferz bikerê awan bîyê.”
