Parlementerê Partîya Demokratîke ya Şaran (HDP) yê Antalya Kemal Bulbulî Meclîs de budçe û Dêrsim de seydîya pezkovîyan ser o qisey kerd û bale ant serê neheqîya pîla ke hetê dewlete ra elewîyan rê yena kerdene.
Bulbulî vist vîrî ke Almanya de heqê elewîyan do bêrê dayene û vat: ”Tirkîya de şima wina nêkenê. Şima do qaşo 3ê hezîrana 2009î de ‘çareserîya meseleya elewî, kurd û romanan’ bikerdêne. La şima nêkerd çunke hîşmendîya şima teng a.”
Bulbulî vera seydîya pezkovîyan nêrazîbîyayîşê xo mojna û venga dêrsimijan da ke wa destûr nêdê seywanan. Bulbulî bale ante ser ke Dêrsim de tarîqatî xo rêxistin kenê û dêrsimijan ra waşt ke wa rayîr nêdê faalîyetanê tarîqatan.
Bulbulî dima xîtabê Wezîrê Turîzm û Kulturî kerd û vat: ”Çi dewaya şima bi kurd, elewî, kurdkî, statuyê Roboskî esta? Çira bawerîya elewîyan qedexe ya? Ma rê deynê şima yê 145 serreyî esto. Şima elewîyan rê bace gênê û danê bawerîyanê bînan. Na dizdî ya. Herinda ke şima pêro şar û bawerîyan rê hûrmet bikerê asîmîle kenê. Şima vanê ‘Elewî û kurdî way û birayê ma yê’ Ma wayûbiratîye nê têdûştîye wazenê. Budçeya nikayêne tekperest, nîjadperest û înkardar a. Ma na budçe qebul nêkenê.”
Qiseykerdişê Bulbulî ra dima Meclîs de nîqaşî qewimîyayî. Wekîlêkê MHPyî fek eşt Bulbulî û Bulbulî rê gef wend.
Merale Daniş Beştaş heqê qiseykerdişî girewt û vat: ”Ma heqê qiseykerdişî şarî ra gênê MHPyî ra nê. Şima mecbûr ê ke goş bidê ma. Şima nêeşkenê herinda xo ra ma rê gefan biwanê.” ANQARA
