Parlamenterê HDPyî Kemal Bulbulî bajarê Dêrsimî de xebatanê weçînayîşî rayîr beno. Bulbulî va: “31ê Adare seba Dêrsimî yena manaya roja wayîrvejîyayîşê heme erjan. Ma do Dêrsim de bi eşqê Xizirî ser bikewî.”
Dêrsim de xebatê weçînayîşê herêmî yê namzedê Hêzê Yewîya Şorişgeran yê Dêrsimî ke binê banê Partîya Demokratîke ya Şaran (HDP) de şonê weçînayîşî bêmaben dewam kenî. Namzedê hemşaredarîye yê Dêrsimî binê ablûqa û kontrolê polîsan de xebatanê xo rayîr benî. Parlamenterê HDPyî yê Antalya Kemal Bulbulî Dêrsimî de xebatanê weçînayîşî rayîr beno. Bulbulî derheqê weçînayîş û xebatan de vînayîşê xo ard ziwan ser. Bulbulî qiseykerdişê xo de veng da heme kesan de rayanê xo bidî partîya şar û heqîqetî. Bulbulî da zanayene ke pêroyê Dêrsimî de kulturê kurdî, elewî û şorişgerî esto û bajarêko sey destatan o.
Bulbulî destpêkê qiseykerdişê xo de dîyar kerd ke Dêrsim zaf kulturî û zaf sîyasetî esas gêno û wina dewam kerd: “Dêrsim wazeno azad bibo. Merdim Dêrsim de tena qala sîyaset bikero bes nîyo. Dêrsim warê heqîqetî yo. Heqîqet sîyaset ra hîna gird o. Dêrsim hetê dewleta yew şexsî, înkarkar û nijadperestî ra ameyo piştiş. Bi qereqol û kuleyan ameyo hepskerdiş. Şar reaksîyonan nîşanê rewşe dano û heta qirik zext bi şar yeno kerdiş. Dêrsim do 31ê Adare de cewab bidon ê caardişan. Şar qayûm nêwazeno û zaf eşkera nîşan dano. Şar vano; qayûm aîdê tîya nîyo. Xebatê ma yê weçînayîşî hetê şarî ra raştê eleeyanê girdan yenî. Vînayîşê mi yê serê Dêrsimî pozîtîf î. La reyna zî merdim nêeşkeno vajo ke tîya de heyecanêko gird esto. Çimkî pêroyê bajarî ameyo piştene û piştişêko xofdar esto.”
Ti şikê mi yê serkewtişê Dêrsimî ra çin o
Bulbulî qiseykerdişê xo yê peyînan de va ‘31ê Adare seba Dêrsimî yena manaya roja wayîrvejîyayîşê heme erjan’ û wina qedêna: “Heme gamê xebatê ma hetê polîsan ra yenî taqîpkerdiş û bi kamerayan yenî antiş. Dêrsimijî vanê ê do qiseykerdişan ra wetayêr sindoqan de cewabê înan bidî. Dêrsim sey rîyê awe vindeto, la binê ci ra awe herikîyeno. Dêrsim do 31ê Adare de wayîrvejîyayîşê heme erjan bivejîyo. Ez wazena ke şar wayîrê sindoq û rayan bivejîyo û dormeyê namzedanê hêzê yewî de bibî xelek. Ti şikê mi yê serkewtişê Dêrsimî ra çin o. La çîyo muhîm oyo ke ganî ma hemverê qayûman de peymeyêko gird ser bikewî. Ganî ma wayîrê ziwan, kultur, xoza, heq û heqîqetî bivejîyî. Wa rayîrê ma heq bo û hetkarê ma zî şar bo. Wa hemrayê ma Alîbaş Xizir bo. Ma do Dêrsim de bi eşqê Xizirî ser bikewî.” DÊRSIM
