Parlamenterê Partîya Demokratîke ya Şaran (HDP) yê Antalya Kemal Bulbulî derheqê operasyonê îqtîdarê AKP-MHPyî yê vera cemxaneyan de qisey kerd.
Bulbulî vist vîrî ke dewleta tirke tarîxê xo ra çirey elewîyî qebul nêkerdî û vat: ”Tirkîya de elewîtîye 1925 ra nata bawerîyêka qedexekerde ya. 1960 de gama ke statuyê Serekîya Karanê Dîyanetî yeno bedilnayene derheqê elewîtîye de munaqaşayî ameyî kerdene wa a zî bêro tewrkerdene. La elewîtîye o wext zî nêameye qebulkerdene nika zî nîna qebulkerdene.
2000 de gama ke Federasyonê Elewî Bektaşî (ABF) ame ronayene seba ke vatişê elewî şuxulîyayo dewa ameye akerdene. Dima na dewa ginaye war. Bi waştişê hemwelatîya seyyewbînîye elewîyan mîtîngî kerdî. Badê mîtîngan serrêke cuwa pê hukmatê dewerî dewrî meseleya kurdan, elewîyan û romanan girewt dest. Ame vatene ke do heqê hemwelatîya seyyewbînîye û waştişê demokratîkî yê elewîyan do bêro caardene. 7-8 kombîyayîşî ameyî kerdene û 35 dezgehê elewîyan bi panc waştişanê esasan nê kombîyayîşan de tewrê prosesî bîyî. Badê pêvînayîşan AKP werte ra bi vîn û mesela qefilyaye. Hukmat bawerîyanê bînan red keno, înkar keno.”
Bulbulî bale ante ser ke Îqtîdar vano înan 58 bajaran de waştişê cemxaneyan goştarî kerdî vat: “Şinê cemxaneyan û komeleyan û vanê ma şewirmendê Suleyman Soyluyî yê, waştişêkê şima esto? Karê dewlete wina nêbenê. Elewîyî nê qebul nêkenê. Senî ke binê simerî ra awe berê, no tewirêko nemeşru yo. Waştişê elewîyan esto la goreyê Sulu û hukmatî cemxane qedexe yo. Cayo winayên çîn o. Cayo ke çîn o û qedexe yo waştişê ci qey şima eleqedar kenê?
Ma meclîs de vanê ganî cemxaneyî sey cayanê îbadetî bîgerîyê binê asayîşî la AKP-MHP red keno. No eynî sey tewirê vera kurdkî yo. Kurdkî meclîs de sey ziwano ke nîno zanayene hesibîyeno, mewlido kurdkî yeno qedexekerdene, perwerdeyê kurdkî yeno redkerdene û hetê bînî ra TRT kurdî yeno ronayene. Yanî elewîyî nêeşkenê wayîrê heqanê xo vejîyê û bawerîya xo biciwîyê la zato sey Suleyman Soyluyî binê destî ra memuranê xo şaweno waştişanê înan museno, ercneno û eke makul vîno qebul keno. Na tekîlîya efendî-koleyî ya. Komelê elewîyan de koletîye çîn a. Coka heta ewro elewîyî bêveng nêmendî û teslîm nêbîyî.
AKP çiwex bikewo tengayî bi nê pê kerdişanê winayênan wazena nefes bigîro. Qale de vana ma semedê bawerî û nasnameyanê bînan çîyêk kenê la esle xo de çîyêk nîno kerdene. Ganî ma nayî rê mexapîye.Senî ke demê prosesê haştîye qedîna, pêvînayîşê bi elewîyan zî qedînayî. Ganî verî eleqîtîye bigîrîyo binê asayîşî. Verê zebanîyêke şewirmendîya Serekkomarîye kerdene vat elewinya reye zewijîyayîş herem o. Serekîya Karanê Dîyanetî fevayan dano. Vano îbadatxaneyê îslamî camî ya, cayo sey cemxaneyî çîn o. No yeno manaya elewî çîn o. Coka ganî pawitişê elewîyan nê hukmatî ra çînê bo, xora çîn o zî.” Çime: ANF
