Hemsereka HDPyî Pervîn Buldane bale ante nêdayîşê mazbata û qeraro ecêbin yê YSKyî ser û dîyar kerde ke YSK kewto mîyanê wesayeta AKPyî û bêhetbîyayîşê xo vindî kerdo
Hemsereka Partîya Demokratîke ya Şaran (HDP) Pervîn Buldane Merkezê Pêroyî yê partîya xo verê kombîyayîşê Meclîsê Cinîyan derheqê babeta rojeve de eşkerayî daye.
Buldane destpêkê qiseykerdişê xo de bale ante çalakîya grevê vêşanîye ya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke seba wedarnayîşê tecrîdê serê rayberê PKKyî Abdullah Ocalanî dabî destpêkerdiş û ewro roja 156. de ya ser û dîyar kerde ke tena Guvene nê bi hezaran kesî zîndanan û teber de seba eynî taleban bedenê xo dayî verê vêşanîye û va: “Grevê vêşanîye ke seba wedarnayîşê tecrîdê serê Ocalanî dyayî dest pêkerdene merheleya krîtîk derbaz kerdî. Hemverê çalakîyan de bêvengîyêk gird esto. Beno ke na hele û game de xeberêka xirab bêra. Ganî hukmatê AKPyî gamêko lez bêvengîya xo xira bikero.Tena AKP zî nê, ganî heme beşê komelî bêvengîya xo xira bikerî. Tena bedenê nêhelîyenî, ma vînenî ke wîjdan zî helîyeno. Seba ke embazê ma bicuyî û çîyêk bi înan nêro, çina destê ma ra bêro ma do bikerî. Na babete de rolêko muhîm keweno milê cinîyan ser.”
Xeylê cayan de temsîlîyetê cinîyan pê ame
Buldane dewamê qiseykerdişê xo de qala prosesê weçînayîşî de zî kerde û va: “Ma xeylê cayan de temsîlîyetê cinîyan pê arde û ma 65 şaredarîyan girewte. Prosesê îtîrazî dewam keno. Beno ke na hûmare zêde biba. AKP azeno ke şaredarîyanê HDPyî bigîro. Şaredarîyê ma do xebatanê nimune bikerî û modelê awan bikerî. Hemşaredarê cinî do taybetî problemanê cinîyan ser de eleqedar bibî.”
Ganî her kes raştîya AKPyî bivîno
Buldane ter peynî daye zanayene ke xeylê merkezê sey Şirnex, Mûş, Wêranşar û sewbîna cayan de îradeya şar ame xespkerdene û ina qedênaye: “Ma seba xeylê merkezan îtiraz kerde, la îtirazê ma nêameyî qebûlkerdene. Weçînayîş ra nata 10 rojî derbaz bî. Mazbatayê hemşaredaranê ma yê Mêrdîn û Amedî nêdayî înan. Îtirazê AKPyî yê seba Mêrdînî hende komîk o ke vano ‘weşî û extîyarîya Ahmet Turkî îtirazname dayî.’ Sewbîna YSK qerar dayo ke mazbataya hemşaredaro ke bi KHKyî ameyo îxraçkerdiş nêdîyo ci. YSK kewto mîyanê wesayeta AKPyî. Komeleyêko xoser ra vejîya yo. Çi ra YSK sere de muracatê namzedê ma yê ke bi KHKyî ameyî îxraçkerdene qebûl kerd. No nîşan dano ke hemverê HDPyî de yî. YSK bêhetbîyayîşê xo vindî kerdo. ANQARA
