Piştî ku PDK’ê hêzên pêşmerge şandin herêma Zînî Wertê (Zînî Estêrokan) di navbera partiyên kurd de aloziyeke mezin rû da. Her çiqas raya giştî ya kurd bertekên tund nîşan dabin û ji PDK’ê xwestibin ku hêzên xwe ji wir vekişînin jî, heta niha PDK’ê tu gav ne avêtî ne. Têkildarî mijarê endamê Civata Niştimanî ya Tevgera Goran Emîr Hacî Kemal ji Rojnewsê re axivî.
Emîr Hacî Kemal da zanîn ku wî demekî dirêj li Zînî Wertê pêşmergetî kiriye û wiha got: “Zînî Wertê ne tenê sînoreke stratejîk ê di nava du welatan de ye, di heman demê de ji bo Hikûmeta Herêmê deriyeke girîng ê aboriyê ye jî. Ji bo vê jî bicihkirina hêzê ya li cihên bilind ên Zînî Wertê dibe ku bernameyeke dirêj be. Ji bo vê, wê di dema bê de karesateke mezin li herêmê rû bide. Hewce nedikir ku hêz biçin ser bilindahiya Zînî Wertê. Dikarin deriyekê asayîşê li nêzî Zînî Wertê vekiribûna.”
Herî dawî jî Kemal ev tişt anî ziman: “Ji bo têkbirina destkeftiyên Başûr û Rojava planeke mezin heye. Bêdengiya hizban a li dijî vê bûyerê cihê şermezariyê ye. Di dema propagandaya hilbijartinê de gelek soz dan xelkê. Lê di bernameya vê hikûmetê de, tiştek bi navê xizmetkirina ji bo berjewendiyên xelkê nîne. Bernameya sereke ya vê hikûmetê, berjewendiyên kesî, hizbî û malbatî ne.” SORAN
